麗新國際（191）過去短短兩個月，插水40%，重返年頭起步位，又可撈底。麗國現水位0.58元，相對NAV1.84元折讓68%，本來已經吸引到痹，家陣揸住麗展（488）12.4%，列作可供出售投資。麗展由今年1月尾（麗國半年結日子）0.172元，飆到上家陣0.34元，短短4個月，再為麗國增值2.66億銀。麗國實際NAV去到兩蚊，折讓講緊71%，有咁大嘅資產折讓，又係流口水。
再講，除非港股有乜冬瓜豆腐，否則，繼續大時代，麗國母憑子貴，享受嚟自麗展同麗豐（1125）增值，家底繼續水漲船高。又麗國股價打回原形，去到今年頭基金PMA曝光日水位，即係話，現價買麗國，已經可以同大孖沙平起平坐。麗國NAV係咁易收窄到65%，代表現價要升20%到0.7元，收窄到60%，現價要升38%到0.8元，炒NAV折讓，實情仲有大把水位。
濠賭股揀冠中
港股對上星期五稍稍喘定，冠中地產（193）就成交咗近3200萬股，聞到有味，要昅昅。冠中NAV0.28元，現價（0.173元）折讓近40%，係濠江系列當中，仲有NAV墊底嘅股仔。
又集團最近宣布配售2.65億份認股證，每份作價5仙，行使價0.2元，承配人嘅成本係0.25元，即係話，冠中現價要升44%先到位。呢期龍頭新濠（200）無視港股跌勢，繼續創新高，若然辣起其他濠賭股，可揀冠中。
錢雋