呢期假日最Hit就梗係去天水圍濕地公園湊熱鬧啦！只不過入面得一間快餐店咁大把，不如搭多幾個輕鐵站入元朗市中心，見識一下正宗山西刀削麵、國家級5星大廚嘅手藝，嗒過你就會知不枉此行！
記者︰劉昱蘭
攝影︰楊錦文
山西苦學正宗刀削麵
由平平無奇的茶餐廳，成功轉型到無時無刻都人頭湧湧的刀削麵店，全靠邱老闆同佢個仔要喺飲食界殺出重圍的決心。
「喺山西無啖好食，日日6、7點起身，齋搓麵粉要搓到起筋呢個過程，已經攰到頂唔順，真係好辛苦好想返香港，但唔學好一門特色手藝，生意好難做得住，點都要頂硬上。」
當時二十幾歲嘅邱師傅，喺山西學識刀削麵後，想落當地舖頭實習，但老闆驚呢位初哥會影響生意唔俾佢落舖，結果邱肯貼錢包底，索性點都要落場，真係誠意十足。學成返到香港都係辛苦，日日捧住幾斤麵粉削削削，唔少學師仔都因為太辛苦辭職唔撈，一個月走成三四個，辛苦程度可想而知。如今可以父子兵拍住上，生意有眼見咁好。
紅牛柳葉麵（$28連冷熱飲品）
紅牛係蘭州牛肉，柳葉就即係刀削麵，因為刀削麵中間厚兩頭尖，形狀似垂柳葉。刀削麵咬落真係好煙韌，配埋邱老闆以8種辣椒、花椒及多種配料秘製的麻辣醬，正宗外省風味。
麻辣豬大腸$38
山西人窮，矜貴的豬肚只賣唔捨得食，惟有以豬大腸做小食。廣東人食炸豬大腸，山西人就鍾意燜多啲，再以麻辣去咗羶味，真係好正。
南瓜餅$18
邱老闆係福建人，當地盛產南瓜，家家戶戶都會識整南瓜餅，嫁女、滿月喜慶時節就一定唔少得。用手搓南瓜同粉，整到細細塊再炸，外香口內煙韌。
生記山西刀削麵（24798033）
地址︰元朗大馬路212號華昌樓地下D舖
由「濕地」前往之交通：在輕鐵濕地公園站乘761路線列車，約15至20分鐘後抵達豐年路站，步行約2分鐘。
出名要等即製西菜
「趕時間嘅就唔好喺度食，去麥記啦！」
有時遇到客人催Order，周師傅總會同夥計呻，但佢點都唔會為多做少少生意，放棄即叫即劏即煮嘅宗旨，所以熟客都唔會催。喺元朗，歐陸菜真係冇乜人敢做，黎老闆話元朗人對兩啖食晒嘅西菜未必咁受，但佢就睇準呢個空間，一於開間西菜館，做大碟西菜，餐廳開頭都做好多麵食生意，吸引咗一批人幫襯先，之後再等佢哋慢慢接受西菜，過咗一排，熟客都唔Order飯麵，統統叫番西菜，果然高招！
1.意式比加地雞胸扒 $78
傳統意大利菜，周師傅點都唔肯講點整，憑小記舌頭，食到外面以芝士煎香，雞肉有陣陣果味，究竟係乜生果？係小記失職問唔到，麻煩大家試後問問師傅啦！
2.北海道黑鯛魚柳 $74
我鍾意食黑鯛魚，貪佢肉身夠滑。周師傅日日都表演生劏鯛魚，以刁草、黑椒、檸檬汁、白酒醃製後再煎。每日生劏鯛魚數量有限，可能4、5碟賣晒就冇。
3.香橙麒麟鴨胸 $78
麒麟鴨即係煙鴨胸同煎過的鮮鴨胸，一碟兩味好過癮，鴨肉用紅酒浸過好鬆軟，淋上橙汁開胃惹味。
甜甜咖啡（29446949）
地址︰元朗西菁街23號富達廣場G30舖
由「濕地」前往之交通：
以下3間店均在西菁街，同樣可在輕鐵濕地公園站乘761路線列車，約15至20分鐘後抵達康樂路站後，步行約6-8分鐘。
國家元首大廚空降元朗
易師傅來頭好勁，喺台灣專接待外國元首的西華酒店做過廚，美國老布殊、英國戴卓爾夫人等都煮過餐畀佢哋食。最深刻就係接待老布殊嗰次，佢啱啱下令攻打伊拉克，易師傅幾驚俾恐怖分子襲擊，啲外國傳媒又多到堆滿個廚房，做嘢已經唔方便，仲要係咁問你煮乜畀佢食。呢啲墟冚場面唔可以帶返香港，但台灣食物的靈魂─醬油膏，就每星期都會空運到港，要做到最地道，連豆腐都係台灣貨。小店食物保證Homemade，易師傅亦會親力親為，所以款式唔多，但全部都係品質保證。
台式豬腳干拌麵 $27
用台灣醬油膏燜，豬皮又腍又彈牙，燜到7成熟時熄火焗到佢熟，呢個就係豬腳夠口感的秘技。
過橋餃子 $20
用爽啲彈牙啲嘅豬肘肉同埋台灣大白菜做餡，菜的比例比較多，食落更爽口。啲皮又薄又滑，加埋台式醋和豉油夠晒風味。
士林台灣麵（24779775）
地址︰元朗西菁街9號富盛大廈地下
改良泰菜唔太辣
食泰菜有時唔係太辣就係太甜，聽呢度老闆娘Jercy講，原來泰國北部同南部都有唔同風味，香港人好難接受到咁濃烈嘅味道，所以佢誠意改良到最啱港人口味，好似呢度嘅冬蔭功湯，以鮮番茄汁代替青檸，保留鮮味又唔會太刺激啱啱好。好多唔食到辣嘅客人都會嚟呢度食泰菜，皆因隨和嘅泰廚會因應要求調味，玩Fusion又不失泰菜傳統風味。
Jocelyn（左）︰「呢度啲醬汁好特別，我同媽咪唔食得辣都覺得好好味。」
Anita︰「我鍾意呢度啲餸賣相有心思，睇見都開心開胃啲。」
a.咖喱雞包 $68
靈感來自西式的酥皮湯，以直徑8吋長的巨型包，加入椰汁，甜味重，連雞加埋較濃的咖喱同秘製香料焗3個鐘，夠晒入味。
b.椰青蒸蟹 $148
兩者配搭前所未見，飲過啲湯你就知兩樣嘢真係好夾，淡淡嘅椰青味夠清，唔會蓋過越南蟹嘅鮮味，嗒真啲仲有啲香草味，口感多重。
金泰村泰國餐廳（24789808）
地址︰元朗西菁街好順泰大廈28-29號舖
