黎耀祥，自認天生冇格，面目模糊，屬娛樂圈中夠資格被out的首選。當年他殺入無綫投考藝訓班，憑一腔熱血預咗做茄喱啡終老，其後時來運到孭飛做主角，但次次仆到直收場。此後，祥仔信命，寧願選擇站在主角身後，做個快樂的綠葉王。 採訪：朱倬誼
黎耀祥是多產綠葉藝員，晚上扭開無綫，多數會見到他的蹤影，除近期的《飛短留長父子兵》外，還有早前播完的《鐵血保鏢》。祥仔飾演二世祖掌櫃尚忠贏盡口碑，很多網友留言大讚他有資格擢升一線。其實祥仔並非無大志，他做過主角，98年主演電影《殺手再培訓》，映期只得七日，票房僅收十多萬；同年祥仔客串由鄭伊健、郭富城主演電影《風雲—雄霸天下》，票房勁收4,000萬。自此祥仔信命，所以對於幾多線和名份，祥仔都不會再計較。
「我執到㗎喇」
祥仔說：「我冇諗過做小生，隨遇而安，我信命。我做得太耐，有個心態係唔想令自己失望，就唔好有期望。一入行已經知唔會做主角，預咗自己做茄喱啡，做幾十年好似阿叔咁，有份工，住屋邨，牛記笠記，做甘草，初入行諗住係咁嘅一生㗎喇。」
祥仔雖然外貌平凡，但戲實在演得好，劉青雲、黃秋生何嘗算好樣，但紅了，祥仔很了解自己為何同人唔同命：「佢哋有型，夠man、夠格，我天生冇格，面目模糊，軟又得，硬又得，好小市民，係人海中被遺忘嗰個。天生外表冇條件，真係有權被淘汰，我算有運啦，冇運炒埋㖭啦，所以甘心做配角㗎。」
做個快樂的綠葉，閒中見人忙，又是另一種感受。祥仔說：「早排我見黃宗澤拍嘢辛苦到死，如果咁拍法，我會死喺TVB，有機會試吓係好，又唔係咁熱衷，冇又唔介意。香港地憎人富貴厭人窮，啲人只會覺得你係攞多咗，唔會覺得你係攞少咗，所以𠵱家得到觀眾讚賞，嗰份支持好感動，唔係講笑！我執到㗎喇，以前住威豪花園，間屋400幾呎，希望將來可以住間700呎，得咗！家陣仲住緊千幾呎，bonus喇！」
人到中年，祥仔買車又買樓，開工長做長有，不知多輕鬆，他笑道：「我𠵱家會睇演戲係一個過程，唔係表演騷啲乜嘢，每次都搵到新感覺。最初我喺TVB做咗13年，係由小學、中學、出面進修到大學課程，空間係無限量咁大，呢啲係基礎，冇頭呢13年就冇後面嘅嘢，真係由路人開始做，正正係茄喱啡，但咁至睇到好多技巧上嘅問題。後尾出去拍電影，好垃圾、好渣嘅電影、好渣導演都拍過，再返TVB之後，已經學識享
欣賞秋生青雲
隨着閱歷漸多，祥仔的演技發揮不再限於《西遊記》裏的豬八戒，能讓觀眾多面睇。不過，一山還有一山高，祥仔心目中就認定黃秋生和劉青雲是香港演技派高人。
「我同秋生合作過，佢嘅變化係大到冇底，可能佢有好多機會做唔同嘅角色，可以做土佬、做神父，爛仔唔使講啦，咁衰款，裝扮起嚟又咁正派，呢樣好恐怖，佢做戲係冇包袱。」
祥仔續說：「青雲對事物嘅睇法，畀我好多啟示。有次我請佢睇《殺手再培訓》首映，之後佢問我：『你有冇諗過殺手點揸槍㗎？』原來我真係冇諗過殺手點揸槍。咁簡單嘅問題，佢已經諗深九層，你話幾犀利喇。」演技無底，所以祥仔還是會繼續混在人堆中，默默增值。
