車路事：男愛豐田Previa　女選萬事得Mazda8

「每次出外工作，我都要帶同自己的座駕出席，方便載人之餘也方便運送道具；正因如此，我開始覺得是時候換部大型MPV，貪其空間大可載更多人和道具。所以，今次特別請來一班常常與我一起工作的同事和模特兒，看看他們在新近推出的豐田Previa和萬事得MPV呢類大型MPV中，會選擇哪一部。結果是前者因夠豪華而大受男士們歡迎，後者則以方便度高的後座和獨特中排座椅設計，而取得女士們的歡心。」

記者：鄭達基　攝影：黃子偉
模特兒：Brad、Zoe、Mavis、Tobey

「我們一行六人，主要針對兩車的乘坐感覺出發，選擇自己喜愛的一部，而駕駛操控角度方面，則由我和同事Chris親自操刀。」

■Mazda8的造型大玩跑車化，最啱年輕人口味。

模特兒Tobey：「我最鍾意係Mazda8中排座椅，因為可伸縮嘅頭枕同腿墊，可以令乘坐舒適度提升。」

實不相瞞，Tobey自從上次跟我們一起測試Mazda8之後，便對中排的SuperRelaxSeat念念不忘，就算今次旁邊出現了有類似設計嘅Previa，她仍不為所動。「原因其實好簡單，咪就係因為佢除咗可以將腿墊拉出嚟之外，就連頭枕都有角度可以調校，坐落去嘅舒服程度跟置身飛機的商務客艙一樣，正！」

模特兒Mavis：「Mazda8尾排椅背有一按彈起功能，最啱我哋呢啲鍾意Shopping嘅女士。」

若果要Mavis將已覆摺放下的後排椅背逐張拉番起的話，我諗佢未必肯，因為Shoppnig完之後，仲點會有力氣和心情做呢個步驟呢。「好在，如果要將Mazda8嘅後排椅背返回原位的話，只要輕輕一拉旁邊的控制鍵，便會自動升起，而尾門仲有防夾功能，好安全喎！另外一個我覺得Mazda8啱我嘅地方，就係佢嘅座椅可以令我坐得好舒服，同埋遙控雙電趟門，最緊要懸掛設定啱啱好，行車或過彎都好定，所以我坐咗落去一陣就睡着了。」

模特兒Zoe：「我鍾意Mazda8嗰樣夠年輕，但又鍾意Previa套DVD影音系統喎，真難抉擇。」

「我係年輕人，揀車就梗係要揀部嗰Look後生啲㗎啦，所以喺Previa同Mazda8之間要我揀，咁就梗係揀後者啦。因為Mazda8外形好似成部跑車咁，而Previa就成熟咗啲，好似唔係幾啱我Style。之不過咁，Previa車上一套DVD影音系統同埋兩個大天窗，又係我嘅至愛。唉，真係點揀好呢？」Zoe說。

萬事得Mazda8規格

引擎：2,260c.c.直4DOHC
馬力：163ps/6,500rpm
扭力：21.4kgm/4,000rpm
傳動：4前速+/-半自動波
售價：$269,800
查詢：萬事得汽車（28931112）

記者Dennis：「Previa台2.4公升偈Sell好力慳油，車廂鋪排豪華又齊料，最正是有我至愛的皮椅。」

若要在乘客角度出發，我覺得Mazda8雖然中排是同級獨有嘅SuperRelaxSeat，坐落去好似置身飛機商務客艙一樣咁舒服，但缺點係3排座椅都只係絲絨鋪排，而唔係好似Previa咁用真皮，仲有就係只得一個天窗，後排乘客想喺晚間行車嗰陣曬吓月光？咁就真係Sorry喇！但好在尾門獨有防夾功能補番數。至於Previa，我最Buy就係佢個車廂有桃木裝飾之餘，一套恒溫冷氣仲有埋「離子簇」正負離子產生器及負離子釋放器，令車內空氣不再混濁，抵讚！
講到駕駛感覺，我都係會揀Previa，因為佢用嘅係2.4公升VVT-i引擎，賣點是好力和慳油，尤其在起步時會比Mazda8的2.3公升MZR引擎稍為優勝，配埋4前速+/-半自動波，反應也是直接得多。

■Previa的賣相一如以往，以豪邁作賣點。

記者Chris：「Mazda8車架設定走跑車化路線，彎路反應最明顯，而Previa的豪華車廂鋪排，最啱香港人乜都要齊的口味。」

問Chris如果要在兩車之中選擇其一的話，他竟說：「如果可以將兩部車嘅性格二合為一，咁就Verygood喇！」原來他覺得Mazda8在操控表現比Previa略勝，因車架設定傾向跑車化，加上重心低，過彎反應不錯，而引擎運轉時也沒有太多的噪音。
至於Previa的優點，卻跟我一樣也是喜歡它的車廂鋪排，不但設備夠齊夠豪，最重要係佢嘅空間感比Mazda8還要強，尤其將中排座椅的腿墊拉出後，再將椅子拉至最後，腳部仍有充足的空間，但Mazda8卻可能會有頂腳的情況出現，還有車上的一套DVD影音系統，也是新車最大的優點。

模特兒Brad：「Previa嘅空間感好強，加埋真皮座椅，坐落真係好舒服。」

身為型男的Brad，問他愛Previa定還是Mazda8時，猶豫了一陣便說：「我揀Previa！」問其原因，原來他也是愛它的車廂鋪排夠豪華，有齊皮椅加桃木，仲有埋DVD影音系統，相比起Mazda8只有絲絨座椅配搭，明顯大勝一籌。至於外形，傾向成熟的造型，也是Brad愛Previa的重點。