人到中年，可以勤做運動keepfit，等身材唔好走樣，好似四哥謝賢咁，點睇都唔覺佢就嚟70歲。不過，講到脫髮呢個問題，如果要發生嘅話，真係點制止都制止唔到㗎！已經好耐冇拍劇嘅陶大宇，原來同唔少中年男士一樣，開始有脫髮危機。早前關仁喺跑馬地撞見佢，發現佢頭殼頂部份變得愈嚟愈稀疏，隱約間竟然見到成個O字！真係OhmyGod！
㩒錢買狗糧
嗰晚7點幾，大宇拎住球拍走去跑馬地嘅提款機㩒錢，關仁見佢成件T恤濕𣲷𣲷，估佢應該係打完波嚟。大宇㩒咗幾張紅衫魚出嚟後，就走去附近寵物店買咗兩包狗零食。大宇咁識為愛犬設想，自然都唔會難為自己個肚，尤其是打完波出咗成身汗，都要食番啲嘢嚟補充體力，於是再去隔籬間祥勝茶餐廳醫肚。
原來，大宇幾個波友一早喺茶餐廳等佢開餐，佢哋大概食咗半個鐘頭，就急急腳埋單閃。就喺大宇踏出餐廳門口嗰陣，關仁無意中發現佢頭殼頂啲頭髮相當稀疏，好明顯係中年脫髮問題。望住呢位昔日「師奶殺手」，關仁忽然間感到好欷歔，但欷歔原因並唔係因為大宇嘅頭髮，而係呢個咁好戲嘅演員投閒置散，唔識做戲嗰啲就劇接劇，你話唔欷歔就假啦！
