同狗唔同命，好命狗可以跟主人一生一世，苦命狗隨時遭主人遺棄淪為流浪狗，顛沛流離。好彩呢個世界好心人未死晒，阿詩就係其一，佢從未花過一分一毫買狗，家中6隻愛犬全部自來或朋友送贈，難得聽教聽話，愛狗嘅佢𠵱家仲搞埋狗酒店，大熱天時俾Popeye游吓水，Popeye又確係游得超快喎，8秒就游完1個10米池，唔怪得花朵叫「狗界方力申」喇。
記者：曾冠輝 攝影：伍慶泉
PopeyeShowTIme
未畀過錢買狗
有17年養狗經驗嘅阿詩，仍然好記得1989年6月4日嗰晚，當人人都留意緊天安門新聞嘅時候，佢就喺屋企幫狗媽媽接生：「成家人都無接生經驗，所以專登睇定書，學定點樣幫佢搓肚，等佢生得舒服啲，大約半夜2點順利生咗第1隻，到凌晨6點生埋第2隻，一直等到第2日中午，見佢食得走得知道再無第3隻，先至夠膽去瞓咋。」阿詩未使過1蚊買狗，佢話：「屋企6隻狗，唔係朋友養養吓唔養畀我就係流狼狗，唉！做人要負責任，應該諗清諗楚先好養寵物。」接生一役令阿詩更愛狗，後來仲入西貢學訓練狗隻：「試過報讀坊間課程，不過訓練程序太有系統，未必每隻狗都適用，去西貢某狗場跟師傅學嘢，先真正學識見招拆招，用唔同方法訓練唔同嘅狗。」
Popeye游水最叻
Popeye（3歲）係酒店警察，見其他狗打交一定出手調停，阿詩：「佢仲識睇舖，有次我阿媽要離開一陣，吩咐Popeye睇舖睇手袋，佢真係企喺收銀櫃面個幾鐘寸步不離，等阿媽拎番個手袋先出去玩。」Popeye仲係狗界方力申，一跳落水就搏命游，好快就游完１個塘，仲要一跳就跳番上池面，動作乾淨利落，真正入水能游，出水能跳。
小寶體形大最難教
小寶（3歲）係狼狗同洛威拿混種，體形大性格惡，係阿詩遇過最難訓練嘅狗：「朋友送佢畀我嘅，初時好唔聽話又固執，仲周圍咬嘢嚇人，搵嘢食𠱁佢都唔掂，我知因為朋友遺棄佢所以佢好唔開心，我足足花咗半年時間同佢培養感情，𠵱家先肯做吓握手、趴低動作。」我就覺得小寶好乖，起碼聽足阿詩指令企定定俾攝影哥哥影相。
囝囝最惡霸地盤
囝囝（4歲）最曳最惡，喺屋企霸咗其中一層樓做地盤：「喺屋企囝囝唔俾任何人掂佢嘅嘢，一有人入佢住嗰層即吠，工人要𠱁囝囝落樓先敢偷偷上去打掃㗎。」講真囝囝又真係幾惡，當日我一入狗酒店佢即刻撲埋身喪吠，不過阿詩話佢惡得嚟都幾醒：「唔使點訓練已經識得喺報紙大小便，仲識得同人握手㖭。」
細佬最細膽曉搵食
相比起其他狗仔，細佬（3歲）最細膽溫馴，經常俾囝囝欺負，要Popeye相救先幸免於難。細佬都識得聽指令做動作，不過唔係阿詩教：「細佬睇見囝囝做啱動作就有嘢食獎勵，於是就有樣學樣做埋一份，做做吓就自己學識咗。」睇嚟細佬悟性都幾高，識得點樣搵食喎。
狗酒店設施
阿詩愛狗如命，於是索性開間狗酒店將興趣變為職業，提供寵物寄宿及美容服務。酒店有個寵物游泳池，係炎炎夏日狗隻消暑好地方：「附近公共屋邨無地方畀啲狗仔玩，所以整個泳池畀其他狗主帶狗仔過嚟玩，方便狗主聚集傾偈交換心得。」
寵物宅（24799999）
地址：元朗屏山上章圍250號
收費：泳池每小時會員$40，非會員$50；寄宿每日非會員$80，會員有折；美容每次非會員$100，會員有折
