成龍今年冇份出席法國康城影展，身在香港嘅佢趁住空閒，喺上個禮拜三晚特登帶埋老婆林鳳嬌同囝囝房祖名，一家三口到銅鑼灣西苑酒家食晚飯，共享天倫樂。
雖然只係食餐晚飯，但無論何時何地，成龍都會擺出佢嘅國際影星風範。當晚成龍一家同大班親友，喺酒家設落地玻璃窗嘅VIP房食晚飯，但全程落晒窗簾，相當隱秘，大概到十點零鐘，眾人開餐後，成龍由大隻佬友人開路護送離場，關仁相隔幾十呎都望到成龍大搖大擺，成個大爺咁行出商場。
打扮清爽
臨出商場前，成龍帶頭，妻兒親友尾隨在後，其間成龍突然擰轉頭落「柯打」，講咗句「你負責送佢哋走啦！」之後就同大隻佬行去商場二期停車場，戴住鴨舌帽嘅房祖名就跳吓跳吓，唔知跳咗去邊。
至於一身清爽打扮、戴墨鏡同紮起馬尾嘅林鳳嬌就同老公分道揚鑣，同班師奶兵團到商場一期攞車，由司機接載離開，睇嚟慣性點人嘅成龍，「柯打」對象都係個性溫婉嘅林鳳嬌㗎喇。
Textby關仁
