中環權力核心班好事之徒，講完人家屋企張大字報之後，上個禮拜唔再百厭，乖乖哋學英文。事關呢兩個月煲呔拋出「親疏有別」論，令佢哋成班自命學貫中西乜都見過嘅精英投晒降，冇人識得將呢四個字譯做英文。
大狀M同八方講，佢學過唔少英文，亦好識政治，但搜索枯腸，都冇法搵到一個理想譯法，佢唔忿氣，於是四出去求教外國朋友，點知連鬼佬都擘大個口。勉強要佢譯，惟有畀個「favoritism」八方交差；但大狀M聲明呢個字並唔能夠完全表達「親疏有別」嘅複雜含意，只係好過冇而已。
大編輯Y聞言亦苦笑。佢喺英文大報返工，成日遇到呢個難題，每次都束手無策；見到個夥計寫「Treatseparatelybetweenthosewhohavecloserrelationshipsthantheothers」就𢱑晒頭唔知點算。佢好坦白咁話：最好嘅方法就係避開呢四個字！
咁香港假假哋都係國際都會噃，咁多人讀咁多書，冇理由畀四個中文字考起。煲呔既然上得電台公開宣傳呢個偉大概念，完全當胡錦濤主席「團結香港廣大民眾」嘅最高指示冇到，復又在立法會洋洋灑灑用成二千字教訓單仲偕乜嘢係「親疏」，咁政府當然對呢個「有別」做法好有研究，咁佢哋點繙譯呢？
八方努力做功課，上網搜尋政府文獻，點知搵極都冇譯本。連特首在立法會答問記錄都只有中冇英！打電話問政府中人，佢哋就嗌晒救命；問文化界高手，個個答案都係你唔好考我，睇嚟最後都要古德明老師出手至得。
諗深一層，英國人唔識「親疏有別」，英文冇法子譯出呢個意思，有深層文化因素，事關人哋真正嘅政治家，奉行公平公正原則，點會講親疏，更加唔會講咩「選擇做反對派……以削弱政府的民望、威信為目的」失禮人說話。不過，親疏有得別冇得譯對煲呔政府亦有好處，就係你想喺國際上揭露呢啲所謂「政治家」嘅醜態，都唔知點講好？
爆料熱線：29290000、27860099
報料傳真：26239278
報料電郵：[email protected]