同陳冠希做訪問，壓力來自身邊人，個個都話要攞佢簽名。唔好咁𤓓啦，我同佢事實唔多熟，第一次見面，都是基於他在香港eBay開店，才搭上。佢寸？我唔驚，最驚佢似有啲Artist咁語無倫次，講嘢無Point，帶我遊花園啫！被靚仔寸，我心甘命抵，更何況今趟唔係講乜嘢潮物、Fashion，而係eBay，開正我嗰瓣！做了eBayer近10年的我，絕對願意同你呢個靚仔店主、又係首間香港eBay商店的話事人交流一下。例牌的開場白：點解喺eBay開店？答案一矢中的：「eBay有晒我的TargetConsumers，更何況唔會俾差佬拉！」
記者：陸伊琳
攝影：伍慶泉
Hair：DerekLi@iisalon
Makeup：KarryWong
eBayer專Bid波鞋
第一眼，嘩，真係好靚仔，怪不得同事ABC都嚷着要掹衫尾嚟，我當然一一拒絕。Edison一行7人，人強馬壯，有點被嚇親，但最估不到是他伸出雙手同我握手，Say個「Hi」做開場白。本來理應心情輕鬆好多，他並不如想像中的高傲，但他的有禮、客氣反而殺我個措手不及。
我唔係潮人，編輯最初都擔心我搭唔到嗲，不過講到Bid嘢，我就經驗豐富。在讀書時我都懷疑過自己有網上瘋狂購物症，日日蒲拍賣網，就好似啲師奶蒲股網一樣，只係近幾年呢個症有好轉迹象，只在星期六、日上網Shopping吓。Edison7、8年前回流香港，最初也有我呢個「病症」，但好快便痊癒了，轉向主攻波鞋，「因為嗰時啱啱返嚟，都唔知喺邊度買到，最方便最直接就係在eBayBid回來，所以對eBay一點都唔陌生。如果好好利用，更係生意上的好拍檔。」
網上開士多賣潮物
喺剛過去的星期三，香港eBay商店功能正式投入服務，Edison的ClotInc.就飲咗頭啖湯，成為第一間商店，店名JUICEbay。用番銅鑼灣間店的名JUICE，加埋eBay個bay字，幾有意思。
Edison強調喺JUICEbay賣的絕對是獨家貨，就連銅鑼灣間舖都冇得賣，多會選擇一啲超限量的貨品，方便香港、外國的朋友購買，最重要係唔會有差佬干涉。乜明星賣嘢香港警察會幫手？Edison帶着小小勞氣小小寸話：「我哋賣嘢有人排隊，差佬上嚟鬧我哋。咩事呀？唔通我出件嘢冇人買，我又要報警？」我搭嘴eBay唔使排隊，「咪係囉！eBay好處就係差佬唔會嚟鬧我！除此之外，我出Trip時喺機場成日都發現有外國人着住我哋啲衫。咁乾脆放上去eBay賣，佢哋可以買到，又唔使捱啲貴水貨。」
JUICEbay新貨率先睇
JUICEbay成為香港首間eBayStore，主要售賣東京品牌DEVILOCK同Edison間公司Clot組成的新品牌DEVILCLOT之產品，老闆係Edison話隨後將會有PUSHEADLOGOTYPETEE、PUSHEADLOGOTYPESWEAT、PAMSWEATSUIT、DOZEGRAPHICTEE、STASHGRAFITTITEE、STASHM65JACKET等陸續登場，每月都會有新貨。
近日炒貨
Edison：我公司已經賺緊錢
傾到生意，Edison絕對係100%認真，平時甚麼媾女、輕佻形象都冇晒。我問佢啲生意有冇錢賺？佢一副生意人口吻：「梗係有，唔係做嚟做咩？」有好多人話你為興趣，唔志在喎？Edison話自己的確志在，而且公司唔只佢一個，工作人員共12人，個個都要搵錢開飯。我又衝口而出問：「𠵱家仲使唔使靠屋企？可以自給自足嗎？」佢肯定的答：當然！唔計拍戲唱歌，單是搞ClotInc.呢盤生意都有得賺，至今已成功同好多大牌子如Nike、DEVILOCK、NEIGHBORHOOD、Levi's等合作，大家都見到公司的成績，「佢哋唔係Buy我陳冠希，係Buy我間公司，同陳冠希合作可以係單1次、1個月，但我哋𠵱家的關係係3、5、7年長期合作，證明對我哋間公司有信心，你明唔明？」
做生意可以掌握自己未來
我明。恕我當初戴有色眼鏡睇你，仲以為靚仔只得空殼，再傾落便發現Edison的確唔係靚仔無腦，唔係只懂玩樂度日之少爺仔。咁拍戲、唱歌、搞生意邊一種賺錢方式最有滿足感？Edison不假思索：「搞自己生意！唱歌、拍戲係被動，要等人叫你埋位；而搞生意、開公司就可以預見我的將來，可以掌握我的未來。不過我好Open，有人搵我拍戲，啱嘅我一樣會拍。𠵱家公司都算上晒軌道，我Partners同員工都好幫得手，令我可以放手去拍戲、唱歌一啲都冇問題。」
（a）JUICEbay
http://stores.eBay.com.hk/clotinc
（b）我的eBaystore！
http://stores.eBay.com.hk/206OUTLET
在香港的eBay開店是不收取任何費用，為保障外國的用戶（因部份外國eBay須收費），所以香港的eBay目前只限於香港交易，你當然可以走後門，叫外國的買家上香港的eBay網啦。
