當年波神Jordan係每一個籃球迷嘅偶像，時至今日氣勢一樣冇停過！引用黃興桂的一句話：「睇Jordan打波有今生、冇來世！」作為Jordan迷，儲鞋自然成為一個習慣，要搵齊Jordan系列更加係每個Fan屎夢想，而小記最喜歡的就是AJXI，一來外形煞食，夠晒太空Feel；二來護腳度十足，打街波唔會拗柴。今次新入手的NikeJordanB-2Rue籃球鞋，就將AJXI最美好元素帶畀大家。
記者：羅灝汶 攝影：陳盛臣
11代鞋形＋1代圖案
NikeJordanB-2Rue有別於一般AirJordan系列，可以算是一個「基因改造」工程，簡單來講係一個以功能完整性為目標的設計概念，目標係將舒適、穩定、避震同靈活度4大種籃球運動中的波鞋需求合而為一。
鞋底以輕量化的Phylon做底，配合可以包圍全個腳掌的隱藏氣墊，對於喜愛打街場的球員朋友非常貼心。另一方面，鞋底中的圖案正是AJI的經典畫面，採用的半透明外底再配合DNA式鞋底刻痕設計，提供絕佳的抓地性（當年穿AJXI行過水迹地方時，小記試過跌倒呢
……），而彎曲凹槽設計就增強了移動時的靈活度。最後波鞋中段就有穩定器，可以增加打波側移時的穩定，回想當年AJXI整個鞋身都比較笨重，而且鞋底部份的重量不平衡，對於打波一族非常不方便，特別於橫移時腳掌好易搖晃。今次改良版設計大大改善了當年AJXI的缺點，就算冇儲開Jordan鞋的球迷都一定要試吓，因為真係好舒適呢！
平民版更宜打街波
AJXI於1995年面世，今年正好踏入第11個年頭，Nike就看準了時機，將2000-2001年成為最受歡迎球鞋的AJXI改良出JordanB-2Rue。業界人士解釋這是向Jordan的致敬，因為AJXI推出期正是Jordan退休2年復出時的代表作。除此之外，B-2Rue絕對是「平民」版球鞋，價錢比AJXI低兼且更適合着來打街波。而B-2Rue之前推出的全白及近期推出的灰白都非常受歡迎，之後更陸續有多款顏色推出。今次推出的漆皮黑白版，外形最貼近AJXI，可以說是AJI同AJXI的變奏版本。
95年劣評千禧雪恥
於1995年推出的AirJordanXI可以話代表了雙重意義，一為Jordan季後賽復出，二為設計師TinkerHatfield的回歸之作。其流線型外觀加上鞋面的漆皮增加了美觀程度，更被一眾鞋迷稱為「史上最漂亮運動鞋」，鞋跟早期繡上45後期改繡23（發售版為印上）。不過AJXI有一個重大缺點就是耐用性低，漆皮容易爆裂，尼龍鞋邊和鞋底都會變黃，令到鞋迷非常失望，導致當年AJXI唔算太普及。到了2000-2001年球季，AJXI復刻上市竟被掃至斷貨，從此便成為AJ系列中最受歡迎的鞋款。
SportGallery（23881332）
旺角信和中心G5舖
