黃金周後嘅樓市，短期內點睇都冇咩上升動力，連愈炒愈㷫嘅內地樓市，都因為中央一再打壓炒風而蒙上陰影，中港兩邊做嘅地產代理，兩地加埋咁大棚員工，維持業績之餘，仲要有好成績贏對手，其實都幾頭痕。不過，樓市點弱都冇沙士嗰年咁慘情，想保持銷售成績，搞花臣呢類指定動作都要有新意。
中原地產代理馬灣珀麗灣貨尾，為吸引多啲準買家留意，中記麥成輝話，公司準備近萬份宣傳小冊子，除珀麗灣每戶都有一份外，今日起仲會透過葵青區約10個報攤，派發畀途人，總之有殺錯冇放過。
另外，中記亦代理深圳紅樹西岸，喺香港嘅展銷會仍然繼續，負責人周永輝話，發展商百仕達已經表明，下個月世界盃開鑼，紅樹西岸展銷廳內亦會搞吓節目響應。個盤月中開始喺香港搞展銷，累積有十零宗成交。