新濠（200）因為話打算分拆合營賭場去美國上市，股價連炒兩日，就連其他濠賭股都受惠隨勢炒埋。經紀黃話，原來摩根大通一連兩日搞咗個澳門概念股會議，提高咗芬佬對濠賭股嘅興趣。
新濠昨日最高升見21.2元，收19.95元，升3.1％；家姐打理的信德（242），都升咗4.52％，收10.4元。早幾日提及的另一隻澳門概念股豐德麗（571），都算叫做穩步上揚，微升1.77％，收5.75元。
但經紀黃話，數嚟數去，獨係隻遠東發展（035）尚未回氣，隻股個零月前獲美林出報告唱好，曾經上過4元水平，但企咗一陣後就反覆回落，早幾日更一度跌穿3元樓下，就算係昨日大市反彈近200點，遠展都只係升番3.3％，收3.125元，與其他澳門概念股相比，難免失色。
或者係咁，所以老闆老虎仔出手，響3.068元增持咗100萬股。其實除咗大股東外，其他坐重貨嘅芬佬都仍然坐齊貨，所以市況若好轉，唔排除輪到佢反彈。
慕容小初