成日話香港人忙，計我話香港好多時間多到使唔晒嘅無聊人就真，關於巴士阿叔嘅新舊網上作品，閒閒哋有成50個。整得呢啲創意作品嘅多數係電車男，香港有，唔出奇，奇就奇在第一水阿叔爆粗短片居然有六分一香港人睇過！其他有無誠意嘅作品都吸引到幾十萬人瀏覽，數最無辜者當然係正牌阿叔林尚義，好彩有好拍檔鍾志光幫佢出頭講番兩句說話啫。
記者：許維雅
攝影：黃子偉
「有壓力」熱潮愈煲愈勁
第一水阿叔爆粗短片大大話話有百幾萬人睇過，估唔到港人對粗口咁有興趣，就連電台節目都大肆談論呢條片。睇嚟呢股「有壓力」熱潮似乎有愈煲愈勁之勢。繼後擺明趁熱鬧嘅創意作品起碼有50個，有誠意嘅。配埋卡拉OK字幕；無誠意嘅，就求其Key啲周星馳、譚詠麟配相或者海報，仲有人將大量關於呢條片嘅精湛對白放落Tee，擺喺美國網站出賣，有無人買仲係未知之數，因為仲未見有人喺街着過，但真係不得不讚香港人一句反應夠快！
第1位：881訪問四眼仔
第1位：盧覓雪喺《在晴朗的一天出發》談論過呢件事、森美上網搵過四眼仔，終於881成功搵到四眼仔訪問，訪問內容俾人放上網。四眼仔一回應就即被網友狂插，狂插佢死撐：「我玩緊阿叔……媽咪都讚我咁都忍到……」夠喇！呢啲咪叫架就自己丟囉！
〈 http://www.fotop.net/panorama/bm/4eye?r=fotop〉
第2位：Rapremix好多個「diu」
第2位：誠意之作，有人將巴士阿叔嘅對白變成Rapremix，就連熱愛音樂嘅編輯彬彬都大讚每個Rap音拍子都準到不得了，可惜有歌無片，不過齋聽個「diu」音已經好過癮。
〈 http://www.youtube.com/watch?v=6_sUPTv0t1Y&search=%E5%B7%B4%E5%A3%AB%E9%98%BF%E5%8F%94〉
第3位：「我有壓力」Tee
第3位：喺美國一個自創圖案Tee網站，有人設計咗一系列「我有壓力」、「未解決」Tee，仲有衞衣同狗仔衫，每件賣十幾廿蚊美金，有日畀我喺街度見到有人着，我一定過去同佢揸手，即係搞掂件事！
〈 http://www.cafepress.com/shanshansbus〉
第4位：《煞科》版勁爆「xx老母」
第4位：講明《後生仔卡啦ok版》，聽落真係唱得吓，字幕識得跟住歌詞變色，阿叔把聲代替咗MC仁，同鄭秀文首《煞科》夾到無倫，叻！
〈 http://www.youtube.com/watch?v=_v48tRk-Yy8&search=%E7%85%9E%E7%A7%91〉
鍾志光幫阿叔大平反
打電話問林尚義，正牌阿叔無回應，但同阿叔拍檔多年嘅鍾志光就話佢都有睇過段片：「一笑置之喇，一睇就知唔係阿叔啦，阿叔都唔講粗口嘅，同埋阿叔自己開車返工，唔搭巴士㗎，阿叔年紀都大喇，收晒火啦，講波係有時幾勞氣，但係投入啫，我同佢合作咁多年，未聽過佢講粗口。」
Poster贈興
爆粗巴士阿叔已經人所共識，好多Newsgroup都講呢件事，講完仲要參與埋一份，唔識Mix歌唔識設計Tee都求其整番張海報仔贈吓興，幫阿叔搞吓Crossover，有碧咸有教父仲有龍貓，成件事忽然好世界性，睇個勢應該要等世界盃開波先丟得淡。
街坊點睇
