飛短留長：上海髮界10件事$96做大劉

上咗年紀的富豪名人們勁鍾情舊式上海理髮店，可惜現在已買少見少了，年輕一代有幾多個會去/敢去幫襯？印象中上海理髮店只是「阿伯竇」，幫人剪同被剪的都起碼是老竇級。採訪過後，可以話你知這種舊式上海舖亦有太多可愛處，今次帶埋「處男下上海」的權仔，感受吓連大劉都Buy的$96「洗剪吹剃」全包宴。

記者：黃藹瑩
攝影：陳盛臣
Model：權仔

■張師傅先噴濕權仔的頭髮，然後就以熟練的「手勢」幫佢創造新髮型。

■可能你會覺得好搞笑，點解乾住個頭先擦洗頭水，洗頭又要向住「瓷盆」洗？實在答你唔到，張師傅話啲次序一向都係咁。

■上海理髮會幫客人刮鬚、修「滴水」、修眉及面上雜毛。張師傅：「我哋以前學師的時候日日都要練手腕的力度同靈活度，唔易㗎。大劉最鍾意我哋剃鬚的手勢。」

身家百億的大劉（劉鑾雄）都愛來這裏幫襯！即係你畀得起$96一樣得到富豪享受。店老闆張師傅話大劉都係收一般價錢，貼士亦唔會特別多，想豪過佢一啲都唔難。除大劉之外，曾江亦是常客，就連范徐麗泰都曾經有幫襯過。

■大劉每次來到都會坐中間這位置，而保鑣就坐左前。張師傅對他最深刻的反而是早幾年寶詠琴逝世時，大批記者在店樓下守候。

■權仔咁大個仔第一次來到上海舖剪髮，表現極之緊張，張師傅一睇就知：「唔使驚，我唔會鏟你個頭，我怕你剪完喊住走，哈哈。」

上海理髮當然包洗剪吹，不過次序問題並非「先洗後剪再吹」，而是先剪後剃，是剃鬚的剃，之後才洗頭，最後一次過吹乾。這個剪刮洗吹四部曲套餐盛惠$96，剪髮包刮鬚，未見識過的男生，有興趣一試嗎？老闆張師傅表示，全包宴收$96已有多年，當門鈴一響，即表示有客到，大家都不用說話，個客好自然會自己坐定定，師傅亦會自動自覺做齊四個動作，算是舊式理髮店內客人與師傅的默契吧！

■刮鬚之前先要用幾條熱毛巾包實塊面，目的好簡單，就係以熱力擴大毛孔容易剃刮。

上海式理髮的另一個賣點當然就係刮鬚服務，所以把刮刀又點可以求其？張師傅話當年學刮鬚之前就先用3個月去練鬆手腕位，至於刮刀還是德國孖人牌好，可惜價錢由幾百蚊加到成千幾蚊一把，「但就冇以前的咁好用。」真係新不如舊。

踏入新式的Salon，Reception第一時間會問的都是：「搵開邊位師傅呀？」，高級一點的Salon會問多句你想飲咩，以上物品上海舖欠奉，取而代之的卻是獨有的「待客三寶」：只要你坐定定，師傅立即會為你遞上抹手用的濕毛巾、煙仔同雜誌。張師傅話傳統上這3樣物品都一定要遞上，不過現在都只會遞毛巾，煙仔同雜誌就會放在一旁，客人要的話請隨便。

■濕毛巾及煙仔都是「待客三寶」的其中兩種。

■張師傅話這裏的毛巾並不是早安巾，因為早安巾唔夠吸水，這是他們特別訂做的。

上海舖獨有嘅縐紙，同印有店名的白毛巾都是這裏的重要幫手，縐紙防黐髮碎，毛巾吸水力強抹乾頭靠晒佢。

■剪頭髮之前的一個重要步驟，就是要用縐紙圍頸，唔好睇小呢個Step，剪完頭髮的髮碎唔黐頸都係靠佢！

■每個座位前都一定擺放一盒縐紙。

只有在舊式上海理髮店中才搵到的油壓式「飛髮椅」，懷舊味道令人一見難忘。張師傅話店內的7張「飛髮椅」都是30多年前購入的，當時的售價是300多元一張，現在已不可能於香港搵到了，要買過一張全新的惟有於日本訂回來，盛惠3萬元！

■張師傅話張「飛髮椅」好耐用，用咗30年都無問題，要翻新只需換皮。

「你估係《飛短留長》咩？入面劉丹淨係着件白色外套，成個茶餐廳侍應咁！」張師傅笑着批評，他說着制服是上海式理髮店的傳統，「我哋已經唔夠正宗，走咗少少新潮路線（師傅着住Polo恤都打呔！），傳統應該係白恤衫、白外套加黑色領呔，50年代上海式理髮之所以可以取代廣東式理髮，正是呢種整潔同獨有的周到服務。」

■(左起)任師傅、張師傅及卜師傅着Polo恤都打呔！佢哋都慨歎像上海師傅買少見少，「死一個就少一個，又無新人入行，終有一日會式微。」

■望落劉丹的造型又真係幾似侍應。

明星級理髮店把把鉸剪值$8,000，上海理髮店呢？最貴的鉸剪才$400。師傅話：「技術及手勢才是賣點，用任何一把鉸剪都是一樣的。」店裏的鏟頭髮的「百髮剪」及掃頭皮屑的「篦」，對年輕人來說應該是博物館古董。

■全場最貴的鉸剪來自德國，都係賣四百一把。