五月二十四日，本欄講「朱洪武登基」，向靚女經理H解釋黃大仙靈籤，女性求得此籤問姻緣，未必係上籤。內有一句：姻緣天註，不可強求。
讀者反應好快，當日就收到一位女讀者P嘅電郵：「你真的說得很容易啊！本人現年38歲，單身，女校畢業，幾位同學及朋友還未結婚，她們大部份都不是想創一番事業，而是天註定嗎？……我的40多歲朋友曾經很失意，美國大學畢業，靚女如某明星，住半山……到今天也未完成心願。」
睇嚟單身成功女性（講職業/事業成功），老套啲講句「摽梅已過，嫁杏無期」者，不在少數。讀者P講到男的去上海，女的如何抉擇？辭了工跟去上海，又如何？犧牲自己事業，強求與男子結婚，結果還是離婚。只好安慰自己，曾經擁有過。呢個係悲情故事，左丁山知道另外一個開心故事，就是女記者之男朋友調去上海做分析員，於是辭職不幹，去上海陪男友，後來男朋友調回香港，兩人結婚，女記者跟男朋友學習，轉型成為分析員，另闖新天地。故此女性的抉擇未必是悲，亦可能是喜，如果事先對異性朋友嘅性格作一番理性分析，唔好被感情遮掩眼睛，抉擇會聰明啲。
呢日到鏞記食飯，與總經理K見面，總經理K介紹兩位靚女同事，其中一位係策略發展總監靚女L，佢話讀大學之時，坐在逸夫堂聽過左丁山演講。呢啲事，左丁山點會重記得呀。問靚女L：「當時我講乜嘢題目？」靚女L話：「好似係講傳媒管理囉。但我哋成千名同學聽得最入腦嘅，就係你鼓勵大學生在大學時期，應該把握黃金機會去拍拖。同學與同學之間拍拖，機會成本好低，而且因為大家重未知道將來有冇工做，會唔會發達，所以感情真純，愛上對方，唔係為咗金錢與地位。」咁又點呢？左丁山立即問佢：「你結咗婚未？」靚女L咭咭笑：「嗰次聽完你演講，咪留意吓啲男同學囉。畢業後幾年我哋就結咗婚嘞！」甚麼傳媒生態，傳媒管理，左丁山講過乜，靚女L已全無印象，好彩佢記得最重要一點，把握機會，在中大校園拍拖，由崇基荷花池行上新亞水塔，佢話係全港最佳拖手仔地段。