唔知係咪打過誠哥嘅工特別馨香，所以，當雲南一級特產王兟離開TOM仔之後，中環金融圈對佢嘅去向仍非常有興趣。佢先排入股273威利做煤體大亨兼夾帶埋𡃁仔助手落腳小廈門北角，華華經已講過，查實兟哥仔真正的落腳點亦曝光：佢經已靜靜雞入咗新橋投資。冇錯，就係舊年年廿八入股8號仔、有無寶不落美譽嘅花旗國基金NewBridge！
兜兜轉轉重操故業
兟哥仔做啲乜？路邊社消息淨係話，佢會睇住新橋響香港個office，咁梗唔係坐響度做看更啦！其實，佢應該做番老本行──高級買手兼推銷員，正確學名即係投資銀行家！咁威利啲煤礦點呢？兟哥早已安排咗佢四哥王林入去幫佢睇實，之前落咗佢啲入咗貨嗰班基金佬絕對可以淡定，因為兟哥仔出名緊張個朵，就算人唔響北角，都幫手頂住個股價嘅！
至於兟哥仔點解入新橋，華華真係唔知，只可以從對佢嘅認識分析吓。嗱，滙豐、高盛呢啲大行佢一早就做過，自己檔私幫生意美投又上埋軌道兼有人幫手睇住，最最重要係，連好多香港人嘅夢想──做超人條𡃁都實現埋，所以兜兜轉轉重操故業做大刁又有幾出奇呢！
話時話，倒數番時間，兟哥仔上年農曆年尾響TOM仔劈炮，咁橋，李家二少響年廿八宣布新橋入股佢檔盈科拓展，事後二少仲話係佢做主動……難道當時仲係周小姐頭馬的兟哥，經已背住周小姐同二少搭上？睇怕呢個謎仲難解過《達文西密碼》！
讀者如有任何意見或報料，歡迎發送電郵至[email protected]。