衞詩承接家姐衞蘭喺樂壇嘅走勢，以為會有一番作為之際，點知最近有雜誌狂踩佢，話佢暴肥同新碟銷量仆直。前晚衞詩同古巨基、鄭希怡、楊丞琳喺將軍澳錄影《勁歌金曲》時，佢好避忌咁話：「我唔覺得自己肥呀，呢啲失實報道唔回應呀，都唔會唔開心囉。」
面對負面新聞，衞詩猶如驚弓之鳥，加上唱片公司人員非常緊張，驚衞詩講錯嘢，佢哋仲要中途入廁所度點回應問題。後來衞詩被問到滿唔滿意自己嘅體重時話：「滿意，不過可以再瘦啲，我希望慢慢瘦，瘦啲上鏡靚啲。」咁𠵱家有幾多磅？衞詩口快快話：「110磅。」點知佢公司嘅人又搶住話：「唔講體重呀。」咁講唱片銷量啦，衞詩話：「我知真實數字唔係雜誌寫咁，遲啲公司有公布。」
鄭希怡中招
而鄭希怡入行咁耐，都仍然講錯嘢，前晚佢自爆想放假去美國學跳舞，咁問佢男友會唔會同行，佢諗都唔諗就話：「唔會。」自知失言後，即尷尬反口話：「我都冇男友。」成班記者笑佢唔好扮嘢，佢就尷尬咁笑，唔敢出聲。之前傳過鄭希怡同化妝師Andy拍拖，睇嚟係真噃。
