賭王何鴻燊同胞妹十姑娘何婉琪嘅恩怨情仇，由報章雜誌對罵，鬧到上港澳法庭。單官司噚日繼續聆訊。但十姑娘不知幾高招，自己唔出現，只係派個老外羅賓信做代表，仲有辦法要賭王用書面答辯，呢招就勁喇，原來賭王上星期嘅供詞，若果用書面記錄，佢老人家要親身確認，所以下個禮拜又要佢再去法院一趟。
代表唔識葡文
十姑娘嘅代表羅賓信本身係一名會計師，以自己個名開咗間顧問公司，由於唔識葡文同中文兩種澳門官方語言，單係宣誓已經好頭痕，因為澳門法院冇英文版誓詞。即使法院入面嘅英文即時傳譯，都譯到「天一半、地一半」，澳娛三月底開股東會，佢居然譯為五月開。
不過，老外都唔係佔晒上風。話說老外要法院幫佢將葡文嘅澳娛公司章程譯做英文，搞到法院要休庭；之前嘅聆訊由於繙譯需時，羅賓信已經焗坐三個幾鐘，諗住休庭時可以去吓廁所，點知廁所排長龍去唔到，再開庭時俾老外搞到氹氹轉嘅法官潤咗佢一句：「你剛才好似好急」。終於，下晝三點開始嘅聆訊，搞到黃昏七點十分先散水，忍咗四個幾鐘嘅羅賓信，終於有得解放。
爆料熱線：29290000、27860099
報料傳真：26239278
報料電郵：[email protected]