唔講唔知，原來今年係滙豐登陸日本140周年，佢哋為咗慶祝呢個日子，決定派出大班級人馬如邵銘高、鄭海泉等人，下個星期飛去日本主持紀念儀式，聽講滙豐仲會喺日本領事嘅屋企宴請客人㖭。話時話，滙豐喺上海、香港都立足咗141年，舊年好似冇慶祝活動噃。
講開日本，滙豐總經理兼工商業務環球聯席主管梁高美懿話，下個禮拜都會飛去日本福岡，因為亞太區工商業務為慶祝舊年交到數，邀請咗隊中100位精英去當地玩，聽聞香港區名額都有30幾人。
梗係啦，滙豐近年不斷催谷中小企生意，聽聞搞到行內風聲鶴唳，梁太同啲客嘅關係搞得唔錯，喺滙豐總行樓下水牌，經常見佢請客食飯，啱啱個星期二就招待成班阿太；噚日仲犀利，叫埋啲客同佢做宣傳，表哥茶餐廳創辦人張堅庭、連同新華旅遊董事長楊章桂芝，分別以小企及中企身份去滙豐總行做騷，接受梁太送出滙豐公司卡（圖）。