吉叔黃應士（右）主理嗰個公共廣播檢討委員會，噚日再同港台高層會面，聽吓佢哋有乜意見。其實呢幾個月嚟，關於檢討港台嘅意見，都四方八面咁湧出嚟，吉叔都應該收到晒；今次肯再抽時間見佢哋，或多或少都證明佢哋查實都好尊重港台嘅。
帶隊同吉叔會面嘅朱培慶處長（左），會後都話會面氣氛幾好，至少今次同上次唔同，大家已經從理念性問題，轉移到一啲具體情況，例如講番港台需要搬大樓、需要有自己嘅電視頻道，同埋一旦獨立後，希望有穩定同足夠嘅資源等等，但佢冇講到吉叔個委員會點睇，只係話稍後都會就港台角色繼續收集意見，希望七月再同個委員會見面喎。
雖然冇人知吉叔取態，但觀乎吉叔親自迎送朱處長，又搭晒膊頭話對方係老友記（係咪民主黨嗰種「真兄弟」？），相信都傾得幾好。許偉賢攝
爆料熱線：29290000、27860099
報料傳真：26239278
報料電郵：[email protected]