被視為「外國演唱會之父」的樂仕，曾邀過不少國際巨星來港演出，最刻骨銘心一次，原來是04年雲妮侯斯頓（WhitneyHouston）演唱會，樂仕直指當年雲妮獅子開大口之餘，態度更非常囂張，又堅拒做宣傳，結果害他虧蝕數百萬。
商台DJ出身的樂仕（原名林松榮），82年移民多倫多後，跟隨60、70年代美國名DJWolfmanJack搞演唱會，97年回流香港成立WolfmanJack（香港）製作公司，主力舉辦外國歌手演唱會，如近期的PaulAnka和ConnieFrancis、去年的巴伐洛堤（LucianoPavarotti）、意大利失明男高音AndreaBocelli、BeeGees成員RobinGibb和雲妮侯斯頓等。
雖然舉辦這類演唱會的實際利潤不及流行歌手般大，且樂仕經歷過蝕到入骨的慘痛教訓，但他仍樂在其中。
斥囂張爛撻撻
原來，04年在港舉辦的雲妮侯斯頓演唱會，害樂仕虧蝕數百萬，樂仕日前說：「之前一次佢嚟香港，喺台上面拆菲林，已經好多人唔鍾意佢，04年佢再嚟，開價好高，但好多嘢都唔肯配合，任何宣傳都唔肯幫手，記者會又唔開，完全冇機會埋佢身傾演唱會嘅事，好多嘢都愛理不理。
「後來有外國傳媒訪問我有關WhitneyHouston嘅事，我都照講，話佢爛撻撻，雖然有天份，但唔識自愛，結果嗰次啲飛唔賣得，係我幾刻骨銘心嘅。」
方逸華等偶像
雖然苦樂參半，但樂仕仍樂在其中，他說：「戰後嘅新生代𠵱家已經一把年紀，我知容祖兒、陳奕迅唱得好好，但我呢啲年紀嘅人可能唔識聽，大家都想聽番自己年代嘅歌。
「記得有次方小姐（方逸華）同我講：『呢幾年間，你搞呢啲演唱會，就算唔約我班妹妹，大家都可以久唔久見一次。』嗰次AndreaBocelli嚟香港開演唱會，方小姐為咗同佢合照，企喺後台等足半個鐘，好似個小fans咁。冇錯，中間過程係有贏有輸，但我做呢樣嘢其實係享受過程。」
採訪：戴彩煥 攝影：陳偉權