𠵱家做地產版記者，唔單止要有地產知識，仲要學番啲各國嘅文化至有得撈。好似由天恆拓展起嘅北京東直門樓盤，叫做「Naga上院」，Naga唔係英文，又唔似中文併音，真係令蘭西𢱑爆頭。
聽發展商講，原來Naga係印度傳說裏面嘅水神，有庇護人間嘅意思，跟中國人嘅龍有相似之處，係古印度貴族供奉嘅神祇。咁呢個盤係天子腳下嘅北京城裏面，就相當襯嘞。難怪連香港國際巨星成龍都要買番間啦，襯番佢個藝名吖嘛。
個盤喺東城區東直門內大街9號，裏面座古四合院更大有來頭，係晚清「百日維新」骨幹之一康有為嘅二女康同壁住所，又稱羅家大院。𠵱家保留做古迹，成為樓盤會所部份。
發展商話，項目只得99個單位，面積由3200幾至差唔多6500方呎，平均呎價3530元（人民幣‧下同），每間最少都要千幾萬，賣晒可以套到大約15億。目前已經賣咗約30伙。
美聯中國幫手喺香港推銷，下個月會搞名人夜，另有一個大展銷廳，閒人免進，因為只招呼受邀請嘅名人名仕。美聯中國下個月又會安排記者去北京，睇吓個盤示範單位㖭。