世界盃下月在德國開鑼，愛睇波的唐寧鍾情其貌不揚的球星「細哨」朗拿甸奴，更大讚對方可愛。日前唐寧到赤柱拍攝飲食節目，試食10款德國菜，今次真是苦了肚皮。
唐寧日前到赤柱一間德國餐廳為Roadshow拍攝一連四集《世界盃星級家鄉菜之食德好滋味》節目，由於今年世界盃在德國舉行，所以唐寧熱捧世界盃之餘，都不忘推介德國菜。
原來今次是唐寧入行以來首次擔任主持，所以她感到十分緊張，幸好她能順利完成重任，不過卻苦了肚皮，因為有十多道德國菜供她介紹，美食當前唐寧都不顧得節食keepfit，逐一品嚐美食。
可是當唐寧喝牛尾湯配牛肝麵糰時，面有難色，因為牛尾湯賣相奇怪，她起初不敢喝，但最後仍頂硬上，幸好味道鮮甜，她才放下心頭大石。
欣賞細哨幽默
不要看唐寧弱質纖纖就以為她不喜歡睇波，原來她也是足球迷，每屆世界盃都會抽時間睇波，當中最支持巴西隊的「細哨」朗拿甸奴（Ronaldinho），她說：「就算唔識都要睇，呢個係盛事，我鍾意朗拿甸奴，因為佢搞笑得嚟都好可愛，睇佢踢波就好似睇表演咁精采，真係好刺激。我仲知英超聯米杜士堡其中一個球員都係叫唐寧，真係好有親切感㗎。」
眾所周知，大部份女性鍾意睇波主要是睇靚仔球星，問唐寧為何不喜歡公認靚仔的碧咸（DavidBeckham）時，她說：「我不嬲都唔鍾意靚仔，雖然碧咸都踢得OK，但係我都係喜歡實力多啲。」雖然唐寧熱愛睇波，但她無意做「講波妹」，因為覺得自己不懂足球規則，就連玩足球遊戲機時都會誤入自己的龍門，認真烏龍百出。
採訪、攝影：駱華齡
場地提供：KingLudwigBeerhall
