如果要失去至親才學懂珍惜身邊一切人和事的道理，谷祖琳寧願失去所有財產，也不願體驗這種傷痛。短短數月間，谷祖琳先後失去嫲嫲和好友，雖然她近日已抖擻精神投入工作，但歡笑背後，其實仍充滿悲傷，她直言人生觀因此產生極大變化。
谷祖琳的前助手Bonnie年初在家中燒炭自殺，其後連嫲嫲也因病厭世跳樓身亡，短短數個月先後失去至親與好友，打擊之大，令谷祖琳一下子消瘦不少，日前她在尖沙嘴接受訪問時面帶笑容地說：「我心情已經好番好多。」但言談間仍明顯帶着傷痛。
「佢太錫我哋」
谷祖琳說：「其實對助手我仍然好唔捨得，我好擔心，擔心佢走之前未食飽，不過我尊重佢呢個決定，我唔會覺得佢好儍，我只係希望佢開心。」失去助手已令谷祖琳十分消沉，沒想到她馬上又要接受另一打擊──嫲嫲因病厭世跳樓自殺，谷祖琳表示當時花了兩個星期仍未能接受現實，她說：「𠵱家諗番起至會覺得佢太錫我哋先會咁做，佢走咗，令我哋一家更加團結，𠵱家我學識愛我身邊嘅人，我會講出口，人生觀亦有好大改變。」
谷祖琳續說：「𠵱家我變得乜都冇所謂，我當時曾經諗，即使要我拎晒成副身家出嚟，我都想見阿嫲多一日，但原來錢係好多嘢都買唔到，我以前係好孤寒自己嘅人，但𠵱家就會話算啦，應使則使。」
重投工作的谷祖琳除會擔任好友周慧敏演唱會的嘉賓外，也在洽談主持工作及內地劇，悲傷過後，努力工作才是積極面對人生的表現。
採訪：馮美茵
攝影：仇志德
髮型提供：Kel@Hair
服裝提供：CacharelFromit
場地提供：TheContinentalClub,GatewayHotel
鑽飾提供：ARTE
