股市大跌，人人面青。碰到當紅財經演員C姐，腹大便便，睇落六月就會做媽咪，恭喜佢之餘，當然順便問句：「股市尋底，何時見底？」C姐話：「股市係沉底，不是尋底，不知沉到何時，跌到甚麼底。」講笑咩，唔好嚇我呀。C姐話：「五窮六絕七翻身呢句說話，今年特別貼切，因為有世界盃，歐洲一啲大銀行已講明喺六月份唔會睇IPO及公司債券上市，七月先至再玩過。如果話五月跌完，六月牛皮，七月反彈嘅話，應該冇乜錯。」
世界盃決賽在七月九日舉行，冇做孖展嘅散戶，大可攬住啲唔會死嘅股票（如滙豐、中銀），放心去旅行，睇埋世界盃先，七月十號先至重返金魚缸。C姐又話：「上個月最受歡迎、最多人講嘅密碼係QDII，畀特首問一問Wherewereyouguys之後，大家立即北上去拍門，原來衙門中人都唔知QDII嘅細節，於是暫無幻想，QDII四個字支持唔到大市。」
今個月股市跌落嚟，最多人講嘅密碼又係乜？記者G話：「當然係PAAG啦！」唉吔，QDII左丁山都話知些少啫，PAAG究竟代表乜嘢物體，實在係烏垂垂，只知報紙電視日日講，特別係在深圳一間醫院門外發生打記者事件之後。記者G講：「亞視男記者畀四人圍攻，好得人驚。佢係我樹仁同學嚟㗎，又大隻又肥，咁大件都俾人打，換我上去咪死梗？」記者G係嬌小靚女一名，睇落跑大陸線就一定唔適合，留在香港專心跑財經新聞，希望有朝一日成為香港MariaBartiromo，就會名利雙收啦。
QDII失蹤，BRIC死火，PAAG當道，下一個流行密碼會係乜呢？木宰羊。木宰羊係跟曹仁超學嘅，據福建人賓架C講，應該係福建話「唔知影」咁嘅意思，「影」都唔知喺邊，梗係MCC啦。福建人與廣東人分得好清楚，潮州人在地理、道理上係廣東人，但我哋廣東人通常唔將「潮州人」包括在內，一位「我家老爺姓董」嘅讀者來電郵話，佢位老爺係本欄長期讀者，老爺指正：應該留意廣東人與廣府人之別，唔好對住潮州人自稱我哋係廣東人。「老爺」年紀大，心細如塵，左丁山這邊廂謝過了。