應昌佑（Charles）這個名字，對很多人來說可能仍然感到陌生，不過一講到衞蘭和妹妹衞詩，或者大家都會說得出兩人是一對孖女。孖女先後出碟成焦點，屬同一公司的Charles仍在默默耕耘。他不諱言處男作銷量不及衞蘭，但亦無悔當初放下高薪厚職入樂壇闖天下，他說：「我一定會向前跑，跑到冇氣咪休息吓囉！」
應昌佑入行前有一份穩定且收入不錯的工作，可能很多人覺得放棄一切加入樂壇屬冒險之舉，不過當事人卻憑一股勇氣險中求勝，他說：「我做嘢一向唔鍾意諗番轉頭，因為做新人一定會經過呢個階段，而且加入樂壇係自己嘅決定，真係冇唔開心喎！」
從無妒忌衞蘭
Charles跟衞蘭（Janice）及衞詩同屬黎明跟林建岳成立的東亞唱片，早前孖女相繼出碟，頓成傳媒焦點，相反Charles自去年11月推出首張唱片後，聲勢便好像沉寂下來。其實他已靜靜起革命，為第二張唱片作好準備。
問他首張唱片成績如何？Charles皺了皺眉說：「成績的確覺得唔夠理想，好多人都問我Janice隻碟比自己賣得多會唔會唔開心，我一定唔會，其實Janice賣到都戥佢開心，如果咁就唔開心，咪好多歌手唔開心？」
很多人都認為女歌手在這行發展較容易，Charles不否定這個說法，但他說：「我真係唔急囉，而且我覺得呢個圈係鬥耐力，𠵱家呢場比賽先啱啱起步，點可以就咁停低呀？跑番轉頭就更加冇體育精神啦！男子漢大丈夫點可以咁㗎！所以我一定會向前跑，跑到冇氣咪休息吓囉！」他表示唱片公司、甚至老闆黎明也跟自己想法一致。
公司行動支持
儘管處男大碟銷量不太理想，但總算贏得口碑，Charles自言已很滿足。問他會否擔心唱片公司因此卻步、不敢再投資在他身上？Charles說：「𠵱家公司幫我做緊國語碟，我覺得講係冇用，行動就係公司對我最好嘅支持。」
採訪：李珮洳 攝影：陳順禎
髮型：Kate@HairCulture
化妝：江中平
