亞洲出版業協會噚晚喺金鐘萬豪酒店舉行一年一度嘅頒獎禮，由於陳太係主禮嘉賓，又預先張揚會講嘢，全世界嘅傳媒都嚟晒，點知陳四萬一句，今晚唔評論煲呔嘅言論，亦唔講是否參選，搞到大家好吊癮。
好彩班行家死不放過，兜兜轉轉迫到四萬開金口講吓個普選時間表，都算有功課交，而贊助今次活動嘅投資推廣署署長盧維思（米老鼠）就做個人棟篤笑，真係值回票價。
標語：維港匯放我一馬
米老鼠話，原來佢年年七月一日都好驚，怕比自己出名嘅老婆大人Fanny（黃麗君）要佢陪去維園，參加遊行，「咁樣肯定對我嘅前途冇好處。」佢好幽默咁對住台下嘅陳太同老婆大人講，係人都知陳太舊年第一次參加遊行，四萬都唔怕，真係唔知米老鼠怕乜。
原來佢怕冇一隊遊行隊伍啱佢參加，因為行得出嚟嘅，一係就不滿政府，一係就係親中愛國人士，而佢兩樣都係，所以如果真係迫不得已，佢就只好發起第三種遊行，就係組成一隊既有不滿又愛國嘅遊行隊伍。米老鼠唔知係咪因為娶咗個中國老婆，佢喺九七年後入咗中國籍，都有一顆愛國心。
米老鼠仲話，佢連標語都諗到，就係叫大家就維港匯放佢一馬，呢單嘢搞咗佢成三年，仲長過打韓戰，咁啱佢星期日要去韓國訪問，真係感受良多。
米老鼠梗係想人放過佢啦，不過，班立法會議員前日仲追緊政府，要佢哋交報告。咁米老鼠好多老友，佢哋噚晚開到口問陳太，如果你仲係CS，會唔會放咗隻肥老鼠？咁嘅問題，陳太點會答，於是大耍太極，話做公務員第一條規條係唔答假設性問題。不過，其實陳太都已經離開公僕行列，估吓都冇妨啫！
爆料熱線：29290000、27860099
報料傳真：26239278
報料電郵：[email protected]