壽司都有熱食？《X-Men》中都有冰火大戰啦，呢個世界有咩係無可能㗎？正如近排日本料理店嘅新搞作，推出熱食壽司新概念，鐵板、火炙壽司，啱晒唔鍾意食生冷嘢嘅朋友。嫌騎呢？傳統凍食都有新配搭，生果、鮑魚、燕窩、魚翅做材料又如何？今晚嚟個冰火壽司宴都仲得，只要你係壽司fans，必Buy！
記者：曾靜茵
攝影：何家亮、譚盈傑、伍慶泉
（I）凍食系列 好矜貴
凍食壽司嘅新產品除咗有新空運抵港嘅魚類，仲有名貴嘅鮑魚、魚翅同燕窩做材料，好似魚翅撈飯咁矜貴。不過唔慣食鮑參翅肚，亦可以選擇用清新嘅瓜果蔬菜加入壽司，口感清新健康。另外仲有甜品壽司，多款新口味任你揀。
鮑翅燕壽司拼盤$138（e）
拼盤中包括有金箔的溏心鮑魚片壽司、海膽魚翅壽司、黑魚子燕窩壽司等，食得矜貴，可以話係夢幻組合。
飯田林師傅：「溏心鮑魚片配金箔，入口腍滑亦夠矜貴，而黑魚子燕窩壽司，外層嘅青瓜薄片入口都好清爽㗎！」
鮮果壽司$15/2件（g）
最新推出，外形賣相都與真的壽司極為相似，食落凍冰冰而且當中的蛋糕亦軟綿綿，除有芒果及綠茶味外，還將會有楊梅及脆米朱古力味推出。
Bill：「幾創新，食落口凍冰冰又有生果，夏天就最啱。」
柚子香芒大蝦卷$58/8件（f）
炸過的吉列蝦配以新鮮冰凍的芒果及青瓜絲製成卷物，有冰火的口感，而在面層還鋪上鮮黃色的柚子味蟹子，單是顏色賣相經已夠晒吸引。
御品師傅阿Wing：「卷物勝在變化較大，而加入新鮮水果正好配合夏天飲食潮流，當中仲有股清新香氣。」
（II）熱食壽司 夠騎呢
食壽司不再只是三文魚、鰻魚咁普通，𠵱家嘅配搭經已層出不窮，就連年糕、鵝肝、鮑魚都可以成為做壽司嘅材料，當中還加入了秘製醬汁調配，每啖都味道香濃。
海鮮壽司薄餅$45/4件（a）
充滿薄餅風味的壽司，有蝦、魷魚、八爪魚等材料，再配上意大利芝士及秘製芝麻醬來焗，入口有陣陣的芝士濃香，加上底層的紫菜，非常惹味。
Johnny：「好有創意，個秘製嘅芝麻醬有酸咪咪嘅感覺，好開胃。」
吉品鮑繡球壽司$280（e）
用上35頭的吉品鮑，入口軟滑腍身，再配以加入了吞拿魚、三文魚及油甘魚的繡球壽司，可謂全港獨有。
飯田老闆翁先生：「35頭嘅吉品鮑，用中式嘅方法，以老雞、排骨等煲十幾個鐘先得，加埋日式繡球壽司，中日合璧，夠創新矜貴喇啩？」
鐵板醋青鵝肝軍艦壽司$58/2件（b）
以鐵板燒的方法加入紅酒來煎香鵝肝，然後放於壽司飯上拌以酸咪咪的醋青魚圍邊，咬落鵝肝香脆味濃，而醋青魚的酸亦予人清新醒胃的感覺。
阿華：「鵝肝配壽司夠創新，鵝肝煎過後好香脆，配埋醋青魚，味覺感到清新。」
（III）爐燒火炙'sChoice
有好多人對壽司刺身都耍手擰頭，因為從來都唔食生嘢，所以近年流行火炙熟食。其實經火炙過嘅刺身，食落有另一種味道，入口肥美嫩滑，而且經過爐燒過嘅熟食，咬落更加鮮甜多汁。
豚拖羅壽司$12/2件（c）
豚拖羅其實是豬頸肉，燒的時候不加油，再配以大廚秘製的醬汁，入口不油膩而且非常惹味。
Cat：「我不嬲都唔食生嘅刺身，所以好少食壽司，不過呢款豚拖羅入口好香唔油膩。」
珍寶帆立貝壽司$35/2件（c）
特別選用空運抵港的北海道帆立貝，比普通帶子大成倍，口感鮮嫩無比，而且經火燒後亦不會抽乾水份，肉身多汁飽滿。
Mandy：「外間好少食到咁大隻嘅帆立貝，真係啖啖肉，燒過之後仲爽。」
燒墨魚鬚壽司$9/2件（d）
肉質彈牙的墨魚鬚燒熟後再在表面掃上濃厚的醬汁，入口還有豐富的肉汁，除了爽口之外，還帶有鮮甜味。
Catherine：「熱食嘅燒墨魚鬚好香，而且肉質夠厚，食完之後個口仲留有鮮甜味。」
ShopList
（a） 金水刺身居酒屋（27241388）
紅磡黃埔新邨德民街31號地舖D室
（b） 和井鉄板燒專門店（31881786）
旺角通菜街78號地下
（c） 板前壽司（21108504）
銅鑼灣東角道24-26號怡東商場地下1-3號舖
（d） 元氣壽司（26675616）
大埔超級城C區地下
（e） 飯田日本料理（28930333）
銅鑼灣駱克道447-449號中威商業大廈1-3樓
（f） 御品日本料理（31265810）
元朗教育路68號9兆豐樓10-14號地下
（g） 美心西餅（27433311）
全線美心西餅