各位《金手指》嘅fan屎，唔知道你哋仲記唔記得兩個禮拜前，孫柏文用隻金手指試圖篤醒香港啲互聯網寬頻服務供應商。當日，喺我篇題為《互聯網供應商交資料白癡不如》嘅文章裏面，我就話過啲互聯網供應商冇一個對客戶私隱有執着嘅態度，因為高等法院頒令，迫佢哋交出客戶私人資料之後，佢哋就只係講句「經過徵詢律師意見之後」，決定投降唔繼續上訴。
當日，我免費獻計畀佢哋，教佢哋一間公司點樣可以喺一個對手同你售賣一模一樣服務嘅市場裏面突圍。因為大家問心嗰句，香港互聯網供應商除咗鬥價錢，同埋啲花招之外，邊度有分別？所以，如果真係有間互聯網供應商被頒令要交出客戶私人資料嘅時候，上訴到底，覺得客戶私隱係神聖同不可侵犯嘅，咁大家仲唔會覺得佢嘅寬頻服務有優勢？仲唔會覺得嗰間互聯網供應商係一間有正義感嘅公司？
次次輸次次上訴
篇文出咗街之後，四大互聯網供應商都差唔多完全唔敢出聲。和記寬頻？Silence。PCCW？Silence。香港寬頻？Silence。惟獨是有線寬頻，傳真回覆畀我。不過，佢哋唔回覆都算數，我睇完有線嘅回覆先至火滾。冇錯，以前都曾經打過呢類型嘅案件，亦因總體特區政府完全唔明白科技變遷，令到四大互聯網供應商全軍盡墨，而唯一得有線寬頻上訴。嗰次佢哋上訴，我真係好敬佩有線，最可惜就係冇用盡一切辦法，上訴到底。有線寬頻係證明咗佢哋比其他3間互聯網供應商有脊椎骨，不過今次就即刻投降，同其他3間互聯網供應商有咩分別？
上次孫柏文都講過，唔係淨係上訴一次就得，要得民心，互聯網供應商就要次次被人告時，次次都要打。仲要喺總體特區政府明白科技變遷之前，次次被人告都會輸嘅情況下，次次都上訴。咁先至叫做對客戶私隱執着，咁先至可以贏得民心。
等吳先生落命令
再講，呢個世界做互聯網生意，一定要謹記千祈、千祈唔好問「律師意見」，先至決定去做或唔做任何嘢。千祈唔好問：「律師啊，我想做呢樣嘢，我可唔可以做？」對付律師，只可以同佢哋講：「律師啊，我會做呢樣嘢，幫我搞到係合法嘅。」唔好話孫柏文冇益你哋。
講真，我對於有線寬頻咁唔開心，都係因為佢哋嗰次上訴，差啲令到我覺得佢哋對客戶私隱執着。不過，如果從今開始，有線寬頻真係次次被人告，都次次同人打，跟住次次輸都好，仍次次上訴，有線寬頻喺我心目中，就會係一間為咗香港未來着想、值得大家支持嘅公司。仲有，如果有線寬頻真係變成徹底擁護私隱嘅神聖精神的一間公司，就反映到佢哋揸fit人都係一個徹底支持私隱嘅人。所以，孫柏文承諾，有線寬頻如果承諾從今日開始次次戰鬥到底，下一次吳光正先生再選特首，孫柏文不單會支持佢，為佢喺烈日當空底下派街招亦在所不辭。吳光正先生，只要你肯落命令，孫柏文講過嘅一定算數。
孫柏文