喺屋企燜牛腩就最怕要睇火，一下唔留神就容易燜過火煲乾水，所以平日我都會推介朋友用電飯煲來燜煮牛腩，夠快捷又唔使睇火。而最簡單就莫過於煮冰糖牛腩，首先將牛腩飛水，然後爆香老薑，再將冰糖、燒酒、牛腩等一併放飯煲中待其自動燜煮，大約燜1個多小時就食得。若想湯汁更濃，可在最後5到10分鐘，轉至煲中至大火將肉中的膠質逼出，食時就不用打芡了，又夠濃味。
買坑腩夠腍滑
若想牛腩食落夠腍滑，買的時候最緊要買坑腩，是牛胸前8支骨的腩肉，是最常用腩位，而且面積最大，牛味最濃。若想口感爽滑，就記緊要買爽腩，或又名繃紗腩，那是牛肚皮的腩位，面積很小，所以價錢亦較貴，但由於當中有塊薄軟的膠質，食落口感爽軟不硬，甚有咬口。