港股反反覆覆，恒指跌125點，收市後15分鐘，即月期指再踩1腳，跌夠187點，低水96點。6月期指開始多啲買賣，轉倉活動出現，低水70點。
下周一期指結算，睇形勢短期仍然向下，或者小彈之後再落。月初至今，恒指散咗964點，到下周二，5月正式埋月結，恒指跌幅估計過千點。
聯通C輪：恒指成份股最威猛係聯通（762），收6.70元，升0.15元，就已經跑贏其他32隻成份股。大摩出報告，話睇7.40元。啱啱喺4日前，聯通話4月份手機客戶增長放緩，聯通股價即刻散晒。大行報告，成日改來改去，咪當真。唔成日改來改去，點有生意做？市況矇矓，股價亦係。買中有得升嘅股份，可能只係運氣，唔係眼光過人。
聯通C輪4829最熱，有290球易手，街貨25球，好多人玩拋波仔遊戲。隻輪10月中到期，輪價28仙（昨升13%），溢價20.6%，槓桿率23.9倍（有效7.5倍），引伸波幅36.9%。追唔追得過？無謂同人玩拋波仔遊戲。假如正股牛皮，過多1段時間，溢價由高位縮落去，揸輪會輸到MM聲。
如果睇好聯通，C輪9846比較實際，但隻輪街貨得0.95%，即係1球，昨日得3萬份成交，冇得搞。
章盛