博大圍反彈，機會已愈來愈近。港股本周一大跌逾500點，股民只係「驚」，但之後幾日，個市仲係插插下，搖搖欲墜，噚日最低潮之時，恒指報15626，又大跌成200點，大戶咁樣做，目的只有一個，就係要徹徹底底摧毀股民嘅信心，將佢哋嘅心態由「驚」變「慌」，到了大家「慌失失」之時，真正的反彈才會出現。
大圍未反彈，但個別股票嘅反彈就已出現，噚日唔計認股嘅上升股超過200隻，有大成交而升勢最勁嘅係騰訊控股（700），收17.85元，大升3.30元，升幅22.6%，主要係收入同盈利都急增，刺激股價創出新高，世紀陽光（8276）升0.30元，收4.05，重上4元水平。
中資股雖然仍未脫疲態，H指仲大跌167點，但兩隻大電力設備股就逆流而上，噚日推介嘅東方電機（1072）高收13.60元，升幅5.8%；哈爾濱動力（1133）亦搶至7.30元高收，升幅6.5%，成交總值更大增到1億元。
哈動貨源大部份在基金手上，股價在50日線獲支持後出現反彈，只要能重上10日線（7.48元）同20日線（7.58元）之上，調整就可確認完成，升浪再起，可衝破前高位8.65元，再創新高。哈動手頭上有未完成定單700億元，足夠未來3年發展，里昂最新報告估計哈動盈利年增長20%至30%，給予買入評級，目標價10.25元。
逆市而上升的股份中，九洲發展（908）可以留意，噚日最高0.83元，收0.81元，升3仙。先講走勢，近兩個月來，九洲股份形成圓底收集形態，現時已升破10日、20日同50日線，向上推進，MACD亦快出現「牛牛」入貨訊號，短線上升目標係前高位0.99元。
成交異動料快開車
再講古仔。九洲係珠海市政府旗下的上市窗口公司，主要在珠海經營酒店、旅遊景點和海上客運服務。現時珠海與澳門已連成一體，澳門十六浦和珠海的灣仔毗鄰，已有計劃共同發展龐大的娛樂設施項目，而中資線就指九洲會擔當重要角色，至於橫琴島開發，以及大型郵輪碼頭嘅項目，九洲亦有好大機會參與。九洲近日成交已有異動，相信好快會開車。
郭兆誠