電腦男話在前頭，原本今日講吓對PS3嘅優劣睇法，但頂頭女波士Mon姐忍唔住「亂入」，搶咗個地盤，咁電腦男睇法惟有順延啦。
PS3？過兩年先諗
Mon姐
睇咗幾日電腦男嘅謬論，仲要一而再擺我上枱，實在忍唔住手要利用上司嘅職權，踢佢走……一日咁多，等我可以反駁一下。
我承認，我係任記DieHard粉絲，即使N64、GC銷量如何不濟，依然瞓身支持。你說PS的畫面如何如何厲害，我就會話PS遊戲就算靚如劃時代的《FFVII》，也只不過是貼圖，人在畫面中其實是2D的，只可在特定的位置走動，但《Mario64》就是真3D，真的可以在地圖中周圍走，還未提那個以後人人學的Analog手掣。至於GC，要玩有啲啲新意嘅Game，都要從GC中找，如《Pikmin》、《ViewtifulJoe》等等，PS2已被各披着華麗外表而遊戲性一般的續作攻陷，電腦男猛話《FFXII》點靚，佢咪又係玩咗個頭而無玩落去！
Wii，唔使講我一定撐硬，睇現時走勢，同期推出嘅Game陣容好強，淨係隻《薩爾達》已經可以煲成個月，如果如大眾所料只係賣2千蚊左右，只不過係一部功能普通嘅中階手機價錢，可以諗都唔使諗就買嚟試試個新模式遊戲世界。至於PS3嗎？其實我唔係話唔撐佢，不過我一定會睇定啲先，第一，價錢咁貴，等於最頂級嘅手機嘞！第二，雖然話有齊《FF》同《GT》啫，都唔知會唔會08年先玩到（尤其是《GT》）！第三，Blu-ray市場有排先成熟，多啲碟先講啦！第四，老老實實，我未試過買同一部遊戲機兩次，PS2例外，喺唔玩老翻、使用度中等嘅情況下壞機，以SONY機嘅耐玩度，打柴都未等到Blu-ray普及。買PS3？不如年底換咗SonyEricsson部勁靚W850i先……罷啦！
明日預告：讀者來稿談Wii
唔滿意本欄論點？對3大主機好多意見不吐不快？即管電郵畀我哋暢所欲言！
來稿要點：
＊成功刊登稿件之作者，將獲贈遊戲精品。
＊稿件字數不可超過500字，本欄有絕對刪改權。
＊每段稿件請集中評論，歡迎多段式投稿。
＊稿件可電郵至[email protected]
＊來稿請附筆名、聯絡方法等簡單個人資料。