大市趨勢仲係向下，未跌定，噚日上晝恒指曾再大跌190點，午後受日股尾段急升消息刺激，反跌為升，但高位始終冇承接力，結果都係以跌市收場。噚日恒指最低15673，由高位回落已逾1600點，短線反彈隨時會出現。
呢兩日，上升股（唔計認股證）已多番，噚日有310多隻，頭10大嘅升幅由14%至26%不等，雖然只係兩三隻較為熱門嘅，但只要大市回升，股仔反彈嘅層面就會擴散，到時候，由低位起計，反彈嘅幅度普遍都會有10%至20%，而且唔難買中。
大跌市之前，推介鞍鋼（347），當時股價6.85元，呢兩三日雖然插過，但噚日大反彈，又高收番6.85元，即係個市跌咗咁多，鞍鋼完全冇影響，寶鋼產品平均提價8%，對鞍鋼有利，鋼鐵業前景不宜睇得太淡。
鞍鋼今年初完成收購，合併報表後，首季淨利潤已11億元（人民幣．下同），升82.0%，收購後產業鏈完整，盈利能力增強，預計06年（12月年結）合併盈利不會少於61.28億元，折算每股盈利超過1港元，而每股起碼派0.50港元，鞍鋼逢低就可以上車。
上升目標16元
東方電機（1072）係跌過龍嘅國企，短短1個月，股價由高位19元大跌到12.25元，跌幅35.5%，噚日收12.85元。
東機4月底宣布業績，成績唔錯，但傳統嘅好消息出貨效應，股價大幅回落，但估唔到會跌咗6元有多，由於今年嘅盈利仍會有理想增長，現價實可以趁低吸納。
先睇05年（12月年結）盤數，營業額30.4億元，升48.5%，盈利5.34億元，升111%，每股盈利1.18元，升110.7%；派末期息0.50元，升316%，派息比率由21.4%升至42%。
今年第一季，營業額同比增71%，盈利升50%至1.37億元，毛利率下跌主要係火電產品進口分包件增多，相信在東機不斷提升產能後，情況會有所改善。
集團現時手頭上有合約總值180億元，今年新增定單目標30億元，公司預期收入可錄得20%至30%增長，大摩估計06年及07年每股盈利分別為1.59元及1.72元，06年預測PE只係8.1倍，可以16元為上升目標。
郭兆誠