滙控大班龐約翰匆匆來港48小時，同本港小股東告別，風塵僕僕，為送別呢位領導集團東征西討、戰績彪炳嘅主席，以滙豐亞太主席鄭海泉為東道，大前晚就喺恒生24樓博愛堂，搞咗個私人派對，賀吓SirJohn榮休。
雖然派對係私人性質，但有唔少重量級人馬出席，其中最畀面嘅就係特首煲呔，佢老人家坐足全場，食埋晚飯先鬆人，龐大班亦好識大體，喺致辭時猛讚香港呢個國際都會，搵勻全世界都無與倫比，一句：「WhatagreatcityHKis！」特首當然冧晒。
出席嘅賓客仲有財經事務及庫務局局長馬時亨，富豪黨就有彤叔加埋郭氏兄弟，而獅子行曾經資助過嘅社群，亦非常有心，唔少年輕人當晚粉墨登場，為龐大班表演助興。
感人一刻
不過講到最感人一刻，睇怕非SirJohn個小孫女，上台用普通話，公開講「公公，我愛你」呢一幕莫屬。成個派對賓主盡興3粒幾鐘，之後龐大班同埋鄭大班，就直接揸車去機場，飛去倫敦出席周五嘅股東大會。