早前六叔邵逸夫個契仔費道宜敗走將軍澳電視城，之後城內城外都估，六嬸方逸華呢個高清（唔係高清電視，係高層大清洗）行動已進入尾聲，意味住六嬸垂簾聽政的日子將成過去，假如六叔退休，TVB又唔賣盤，佢將會正式走出幕前，上演女人天下。與其大家靠估，最好問當事人，華華噚日終於響六嬸口中，首次得到一個好明確的答案──就係邵爵士考慮緊退休！
查實，邵蛇都九十有九，好快就變身百歲人瑞，如無意外，佢應該係當今世上年紀最大的上市公司主席（雖然個單位辦事人好耐之前已經係六嬸），好話唔好聽，就算對做電視大亨幾有熱誠，都應該退落嚟畀Ｄ後生上位啦，話晒六嬸都仲年輕力壯細佢廿幾年。Bytheway，TVB咁多諗頭，當年萬梓良同恬妞結婚都夠膽死出特輯，呢鋪係咪應該食正條水搞個「群星拱照邵蛇迎百歲之夜」呢！
六嬸日日睇《東張西望》
講番六嬸，響費道宜唔撈之後，有啲證券商經已出報告話，六嬸一定會繼續主持大局，呢啲咁小嘅人事變動唔會影響到TVB軍心云云，查實呢啲邊算分析呢，成個權力核心都係六嬸啲靚，走個非佢嫡系嘅老公契仔，阿水都知冇影響啦！
咁六嬸點管理TVB呢？佢話每日都睇《東張西望》，緊貼公司同個圈發生緊咩事，至於一眾師奶喪煲的劇集佢就冇睇，公司啲嘢就交晒畀阿志雲大師班人做。梗係啦，佢最重要嘅工作係照顧六叔嘛！
李華華
讀者如有任何意見或報料，歡迎發送電郵至[email protected]。