淨係睇埋單指數，個市好似好太平，恒指唔見41點，濕濕碎。睇真啲，全日高低波幅256點，好嚇人。港股上晝收市跌188點，下晝因為日股升308點（港股上晝收市嗰陣日股跌緊近70點），下晝開市7分鐘，反升54點。
個市成架過山車，做得唔好，半個鐘頭已經輸到暈。人心唔定，外圍股市飄忽，賭輪要有心理準備，贏輸彈指間，而且幅度唔細。打穩陣波，等恒指見15500揀C輪炒。
長實C輪9871：李超人增持長和系股份，超人效應今次唔靈。長實（001）最叻之時都只係升得0.60元，埋單爬高0.15元咁大把，算係有些少應酬式進賬。長實C輪未見熱炒，最多成交嘅3572，金額都只係2球8。
賭長實C輪，9871對正股反應最敏感。隻輪下月6日最後買賣，輪價27仙，溢價1%，槓桿率30.3倍（有效21.6倍），引伸波幅20.2%。如果想賭，平啲至諗，同埋計住所餘日子。
和黃C輪3568：和黃（013）最叻升0.15元，埋單跌0.30元。
就算睇好和黃，都冇邊隻C輪買得落手。炒短線，勉強可以揀3568，9月下旬到期，溢價8.6%，槓桿率26.2倍（有效11倍），引伸波幅23.5%。記住要快手快腳。只要正股稍稍偏軟，隻輪就會變咗水瓜打狗。要博，都係等好市至考慮。
章盛