今年E3展上，Wii同PS3嘅評論真係好兩極化！Wii就俾人讚到上天，相反PS3就一沉百踩，Game書、各大討論區均瘋狂嘲笑其冇創意兼賣得貴嘅言論。
電腦男噚日「大膽」地認為Wii因機能而不可統一遊戲界，身為任記Fans嘅女波士Mon姐，睇完電腦男篇報道即時有反應，話Wii同PS3嘅實際規格仲未公布，又冇相同作品嘅畫面比較，憑乜話PS3一定靚過Wii？Mon姐更以GC《Bio4》靚過PS2為例㖭。佢講得一啲都冇錯，不過忽略咗好多客觀數據；首先，低階版PS3賣成4千蚊港銀（係人都知已蝕住賣），唔少外國雜誌同網站都估計，單單Cell處理器及圖像晶片組已佔機價一半，即係話已經貴過整部Wii（推測賣200美元），你話兩者圖像處理能力有冇分別？
PS2並不比GC差
至於GC版《Bio4》靚過PS2版係事實，但GC比PS2遲推出，理論上機能係較為佔優，3D、光源運算及霧化等特效理應較好。另外《Bio4》一開始係用GC開發模組嚟寫Game，Fit晒部GC嘅特點，而PS2版只係廠方挖多筆嘅移植作，點都唔會花費大量人力物力去重新編寫，致令PS2版出現「只係一般」嘅錯覺。PS2機能差？你睇吓《FFXII》入面嘅迷宮同城鎮，3D模型組合超複雜但完全唔Lag機，簡直令機迷對SE廠寫個服字！電腦男係明撐SONY，不過買PS3之外亦會掃埋部Wii，當做運動或招呼朋友一流。但要我二揀一，一定係玩齊《FF》、《GT》嘅PS3！
明日預告：續談PS3平反論
唔滿意電腦男論點？對3大主機好多意見不吐不快？即管電郵畀我哋暢所欲言！
來稿要點：
＊成功刊登稿件之作者，將獲贈遊戲精品。
＊稿件字數不可超過500字，本欄有絕對刪改權。
＊每段稿件請集中評論，歡迎多段式投稿。
＊稿件可電郵至[email protected]
＊來稿請附筆名、聯絡方法等簡單個人資料。