九龍塘秀竹園道廣梅大廈，大業主持有收租超過40年，直至近年先至開始拆售，不過進度極之緩慢，主要係業主賣樓嘅作風非常獨特，每賣出1個，佢先放另1個出市場。
利嘉閣九龍塘分行經理楊志霖話，業主態度唔憂賣，繼舊年年中1樓B室賣出之後，事隔1年，至有第2個成交，啱啱易手嘅中層B室，1800呎，成交價976萬，每呎5422蚊，比上年嗰宗成交，呎價高出近兩成。𠵱家業主又推出1個放盤，面積一樣1800呎，叫價1000萬。
廣梅大廈由廣梅有限公司發展，65年落成，樓高9層，每層3伙，合共27個單位，至今只售出2伙；其餘單位除部份由業主家族成員自住外，其餘每個單位月租約3萬蚊。