無論你係咪網球愛好者，網球界重大賽事如大滿貫，以往主要都係喺電視觀戰嘅各位，將有機會「親身」參戰！XB360將會推出著名網球遊戲《TopSpin2》，第2代喺XB360上推出，現場感當然今非昔比，畫面仲靚到好似電視直播一樣！
記者：許福合
今次推出嘅《TopSpin2》係XB360大作之一，喺剛剛結束嘅E3先至正式讓外界試玩，而且仲請來真正嘅職業網球手來試打，可見廠方對此作品之重視程度。
自設角色外形
當進入遊戲選擇球員時，已有相當多勁人選擇，部份更係熟口熟面，有留意網球壇都應該認得出著名球手。如果唔滿意球員外形，仲可作彈性選擇，首先可以大玩換衫，尤其女角服飾，種類夠多款式亦比較多變化，雖然唔學似《DeadorAlive》咁玩美女Feel，不過勝在比較真實！想玩原創嘅玩家亦可以自行設計球員外觀，尤其係髮式配搭好多，想配個型爆光頭女球手亦可！憑XB360機能，用家設計好嘅角色，開場時就可實時重現於CG內，配合比上一代更高水準嘅畫面同場景，擸吓眼真係同睇電視直播無分別！
發球難度高
就算未落場打過網球，都應該聽過「底線抽擊」、「發球上網」等戰術，不過喺《TopSpin2》內比較易用都係底線抽擊，企喺底線打總易過企喺網前，尤其球速快嘅男子組賽事，企喺網前Miss機會太高。唔知係咪電腦AI高，即使喺底線同電腦互抽，節奏好快被電腦控制，玩家只能兩邊救波。
不過講到難度最高，都要數開個Ace球，發球時旁邊會出現一條力量Bar，當以最大力度打出時會出現Max字樣，不過大力唔代表好波，仲要個波過到落點又要準確，有一定難度，所以一開始非發球局反而比較易打。模式之中仲可以選擇雙打，相對就比較易上手，多個拍檔打空都有機會補中。
抵死練習模式
覺得難上手的話，其實一開始可以先試玩練習模式，可以選擇唔同項目去練習，而練習時仲配上道具，好似練發球時，球場會放上好多障礙物，用以確定發球路線。另外練習抽擊落點時，竟然會用埋保齡球，玩落都幾過癮。而喺比賽時可選擇加入球點標記，咁就可以知道自己球路，可練習如何將對手打到左撲右撲。球場亦有硬地、草地、紅土場地等，以草地場畫面最靚，但嫌有太多倒影畫面較花。
PROFILE
遊戲類型：SPT
對應機種：XB360
遊玩人數：1至2人
開發廠商：2KSports
推出日期：6月6日（售價未定）
