噚日，孫柏文同大家講過我對呢排環球股市表現嘅睇法。我亦講過，我哋今時今日係生活喺中央銀行濫發鈔票嘅周期，而濫發嘅速度，就主宰資產價格升幅及跌幅。喺濫發鈔票嘅周期，濫發鈔票速度快嘅時候，股票價格就會升，如果濫發鈔票速度收慢，股票價格就會跌。亦因股票價格不單止會反映今日嘅現實，仲會反映市場覺得未來會發生嘅事情，所以，股票價格下跌，唔需要中央銀行今日收慢濫發鈔票嘅速度，只要市場覺得佢哋會收慢，個股市就可以大跌。所以噚日，孫柏文用咗隻金手指，幫大家篤咗個叫做「世界股市死得未？」嘅表出嚟，畀大家參考。
個表嘅用處，係建基於多個環球股市指數跌穿200日平均線嘅時候，可以為大家肯定跌市大趨勢。不過如果啲指數總體上，係跌唔穿200日平均線，大家可以繼續炒上。
相對嚟講，對於原產商品價格，濫發鈔票速度快嘅時候，原產商品價格就會狂升，濫發鈔票速度收慢，原產商品價格就會升慢啲。所以，我哋生活喺一個原產商品嘅超級大牛市當中。喺任何一個超級大牛市裏面，愈大聲叫人入市嘅人，就愈會令人覺得聰明，根本同分析力強與不強無關。而今次原產商品超級大牛市，最大聲叫人入市嘅人就係我，所以先至被社會公認為絕頂天才，被人話我勁，被人話我隻金手指醒，被人話買實貨白銀冇得頂！
資產升太快有問題
無可否認，呢幾日來都有金手指嘅fan屎寫電郵來問：「原產商品大牛市都玩完囉，係時候你隻金手指返屋企瞓覺未？」首先，我要鄭重聲明，呢幾個自稱為「金手指嘅fan屎」嘅人，不單止被逐出金手指fan屎club，仲已經被列入黑名單之內。擺佢哋入黑名單，唔係因為佢哋挑釁我，而係因為可以咁白癡話「原產商品大牛市玩完」。
如果唔係「經濟盲」都會知道，呢排原產商品價格升幅真係太快。任何資產升幅太快，都會衍生兩個問題。第一個問題，就係正當資產升得快嘅時候，就會吸引好多無知同埋實力唔夠嘅投資者。當然，無知唔係罪過，你哋作為金手指嘅fan屎都清楚明白到乜嘢叫「無知」。不過，正當一種資產開始吸引啲冇實力嘅投資者，特別係啲借錢去炒作嘅投資者，只要有啲風吹草動，佢哋就會投降。
頂唔順市場大波幅
以白銀為例，孫柏文第一次叫大家買實貨白銀嘅3月6日，白銀仲係10美元一盎斯，到白銀升到15美元一盎斯嘅5月11日，都只不過係兩個月嘅事。到今日，白銀就係12.5美元一盎斯，你話當中死咗幾多個冇實力嘅投資者呢？冇實力唔等如冇錢，冇實力只代表一個投資者頂唔順市場大波幅咁解。所以，孫柏文先至用心良苦，千叮萬囑叫大家買白銀就一定要買實貨。
最後，「資產升得快」衍生嘅第二個問題，就係會直接危害孫柏文嘅飯碗。因為就算我係天才都好，擺到明冇可能有咁多好嘢叫大家買。我叫買實貨白銀，為大家訂嘅120美元一盎斯目標價，就算唔需要10年，都至起碼要4、5年時間，等我可以喺未升到目標價嘅期間，寫嘢呃稿費。如果每兩個月可以升50%，乘起來咪只係要1年多嘅時間，就可以到120美元一盎斯目標價？咁到時，我靠乜嘢去繼續呃稿費呀？希望大家明白。
孫柏文