「我過唔到自己嗰關！」一位男性朋友被邀請到SexParty（情慾派對），但思前想後，最終寧願留在家裏無所事事，也不想跟陌生人搞Sex。的確，問過身邊的朋友，無一不說難以接受SexParty，但這個世界有供就有求，有人肯花時間花氣力，自然就有人參與。搞手是個不愁生活的有錢人，閒來無事便約5男5女到家中玩玩，PairUp（搵啱對象）後關上房門便各有各天地，究竟門後的人是寂寞難耐，還是性慾旺盛、尋求發洩？
記者：黃若茵
攝影：黃子偉、陳偉強
角色扮演：Wysam、Kristy、Ruby、Victor、Toby、Blanche（Salvador）
搞手心底話：我無蝕底，好嘢一定我揀先。
含着金鎖匙出世的人，總會做些惹來世人歧視眼光的事。Ben今年28歲，間中幫爸爸辦理家族生意，跟家人一起住在逾2,000呎的豪宅內，當着爹哋媽咪面前，Ben是個典型的乖仔，但每逢父母出埠，就是他露出真面目的時候。「起初都只係叫幾個朋友上嚟屋企劈酒傾偈，有一次朋友帶咗兩個女仔嚟，我就同其中一個搭上咗。」當然，二人純粹OneNightStand，絕無下文，但自此Ben便玩上癮，一有機會，便嚴選5男5女到家中開Party，家中的5個房間極盡其用，酒後齊齊亂性，天光就各自離場。作為搞手，Ben只是抱着「我無蝕底」的心態去搞一個SexParty：「不單止無蝕底，我做埋搞手，嚟到最好嘅女仔一定係我揀先。」
「都係畀機會大家啫」
Ben搞的Party可以算是私人派對，不會隨便讓街外人參與，每次參加Party的人都須經朋友介紹。「搞SexParty可以幫到有需要嘅人，當畀機會大家。」眼見不少參與的人，特別是女性，平日的工作或生活都是比較枯燥，來到Ben家中一個如此私人又保密的地方，反而能夠盡情放縱，發洩平日抑壓的悶氣，亦給予大家一個結交男女朋友的機會。他身邊一位男性朋友便因此而結識一位情投意合的女友，現在已不再參與他的SexParty。
「興趣，不是用來賺錢」
講起SexParty，朋友都問：「入場費好貴㗎？」錯！偏偏Ben搞的Party毋須入場費，要付的錢只是當晚所買的酒水零食，比起去Bar落Disco更抵。當然啦，Ben本身既有父母這個大財源，又何必利用自己的「興趣」去賺錢呢？「搞咗幾次之後，發覺好好玩，除咗每次可跟不同嘅女仔有Sex外，事前一大班人傾偈其實都好開心，飲到醉醉哋時，大家更是暢所欲言，感覺好自在。」Ben一邊說並露出點點玩世不恭的樣子，SexParty已是他的興趣，也可說是他的娛樂。可能也帶點反叛的心理，誰叫他要在父母面前扮演一個安份守己的好孩子，抑制着這個內心的興趣。
「人是獸性的」
跟Ben有共同興趣的朋友，對於他這親力親為去舉辦的活動自是歡迎之至，但嗤之以鼻的朋友亦不乏，「有朋友話我變態，保守啲嘅甚至話我無道德，講真，嚟得呢度嘅都知道大家嘅目的係Sex，牛唔飲水點㩒得牛頭低。而且大家都已經係成人，識得對性行為負責。再講，每個人嘅性需要都唔同，係啱Key嘅咪一齊玩囉，唔鍾意嘅我都唔會逼佢嚟！」Ben深信一個「道理」：「人是獸性的」，所以他覺得SexParty反而可幫助平日性慾受盡壓制的人，將人類獸性的一面釋放，暫時放下虛偽的面具。
過來人的話：不同對手，好刺激
日間Lucia是一位普通不過的OL，她已是第2次參加Ben的SexParty，樣貌不過不失，為甚麼不正正經經找個固定的男友？「我拍過好多次拖，但維持一段感情花費嘅心神令我感到不勝負荷，寧願OneNightStand，一次就算，以後唔使煩。」作為一個事業心強的女性，Lucia認為感情是一個負擔，相反，一段不用負責任的性關係卻令她輕鬆自在，暫時忘掉工作的煩惱。「去Ben嘅Party一來夠保密，二來每次有唔同嘅對手，感覺新鮮刺激。」Lucia心裏也想將來有一個好丈夫好家庭，但現階段還是事業的搏殺期，沒有感情生活，間中的性慾派對已夠滿足。
PartyorSexParty？
你可能喜歡蒲，喜歡到Disco跟異性攬攬錫錫跳吓舞，這當然不算是SexParty，但有心人卻不一定這樣想。John跟4位朋友合作，每隔兩星期左右便在灣仔萬麗海景酒店內，舉辦可容納500人的大型Party，目的是提供一個乾淨正經的場地，讓一班蒲友有個落腳點。但John心知不少來到Party的人，目標就是「媾女」，他亦目睹不少搭上的男女離開Party繼續下一場大戰。這樣跟John搞Party的原意有點背道而馳，但他明白這種人難以避免，「我哋個場整齊乾淨，只要嚟嘅人唔好搞事，唔會令到有人唔開心，我唔會介意佢哋嘅目的，媾女又好，玩OneNightStand都好，佢哋離開個場去其他地方搞就唔關我事。」
跳舞熱身
John本意雖不是辦SexParty，但總有好色男女視之為搜括性伴侶的好地方，因為個場夠大，選擇夠多。作為一個旁觀者的角度，John了解為何有人會在這裏尋找一夜情的伴侶，「嚟得Party飲酒跳舞嘅都係玩得之人，思想行為都好開放，容易得手嘛！況且舞池人多擠迫，仲唔係好機會？」他指多數男性皆以跳舞入手，邊跳舞邊打開話題，覺得啱傾後便會來個中場休息，飲幾杯酒，酒後雙方更加放縱，重回舞池跳舞便會開始有親吻及撫模的行為，下文如何，大家都估到啦。
舞池埋手
從女性角度看又如何？問過數位在場的女性，答案出奇地一致。「只要夾就可以接受。」當然，她們不會主動出擊，來Party的目的純粹跳舞狂歡飲酒，但總不免有男性接近，而男性接近的目的，她們都心知肚明，但不會特別抗拒。Denis自認是蒲精一名，1個星期至少要蒲2晚，「有男仔Approach係好正常，但一定要啱傾，唔會係男人都得，樣衰嘅一定唔得。」雖然不是揀男友，但女生對一夜情的伴侶竟然都有這麼多要求。換個角度，她們雖然不作主動，但單身一人遊走於舞池與Bar枱之間，何嘗不是等待，何嘗不令男性向你埋手呢？
Kristy：「去Party玩一定會有人走埋嚟問你想唔想做，若果真係好夾嘅都未嘗不可，但呢啲地方一定唔係用來搵男朋友。」
未諗清楚要SayNo
護苗基金社工黃婉明：「美國有研究顯示，女性在未想清楚的情況下發生一夜情，事後會感到後悔，並向心理學家傾訴。所以女性出席派對時，如果並沒有發生一夜情的意思，謹記立刻拒絕對方要求。通常男性會以施壓、引誘、死纏、激將、威迫等各種方法，企圖遊說女生進行一夜情，那時女生必須堅持自己立場。另外，參與派對時須注意以下數點：1.相約可信的朋友出席，並預先相約一同離開；2.跟朋友互相監察不要喝太多酒；3.參與派對前，應先了解派對的性質；4.不要隨便接受別人給予的飲品。」
歡迎讀者就有關性侵犯的問題，致電由護苗基金設立的「護苗線」，電話：28899933
