趙飛雲噚日睇見港股開市上試15900受阻，心郁郁想造淡，但望到兩隻重磅大藍籌已跌近短線支持位，中移動（941）喺40元，滙控（005）喺133.90元，如果跌唔穿，造淡可贏水位有限，所以決定放棄，但跟住睇見個市愈跌愈多，接近190點，恒指連15700亦跌穿，開始有啲後悔，食午飯時重諗緊大戶午市會否踩多腳，連15600亦質穿。
誰知日股午市跌近15500大反彈，由低位回升399，以全日高位15907收市。日股出現單日轉向，刺激港股午市以大裂口高開，升上15930，重新收復100日線。趙飛雲馬上由後悔變成慶幸早市冇手多多造淡，並盤算若恒指守穩15900之上應否造好博一轉短線，點知恒指好快又再跌穿15900，最終要跌41點收市。
趙飛雲自問市場經驗唔淺，但昨日亦被大市忽升忽跌搞到全日在「腦交戰」，一時想造好，一時想造淡，事後看，當時無論造好或造淡，結果都是要損手。事實上，港股周一大跌507點，只要手上有揸股票都要損手，分別是輕重而已，而周二及昨日的飄忽走勢，則是專收叻仔或老手的陷阱，只要忍唔住手，都難免要損手。至於大市這種飄忽走勢何時結束，估計會在中行（3988）上市前後。
日股單日轉向
日股昨出現單日轉向走勢，估計短期或有500-800點反彈水位，上試16400-16700區域。此外，如果美股守住11100支持，短期亦會有200-300點反彈，上試11300-11400水平。
假如外圍出現上述的反彈，港股料會跟隨，配合中行上市後的逾千億元資金得到釋放，將提供一段短時期的購買力，可將港股推回50日線至20日線的16300-16600水平。這兩日要注意是港股會否下試15500-15400水平才見底，還是在15700水平已可企穩，至於買哪些股票博反彈，稍後再談。
趙飛雲