「廚神」黃坤最近再次活躍金融市場，收購咗招商廸辰並出任新主席，噚日又獲邀擔任一個介紹民企嚟香港上市研討會嘅講者。佢一針見血，講出民企嚟港上市一個主要關鍵，係要改變思想觀念，咪以為好似喺內地上市咁，仍然將上市公司嘅錢當成自已私伙錢，隨意攞嚟用；始終香港嘅遊戲規則同內地唔同。
同一場合，港交所業務發展科總監李晞禔（圖）亦向在場嘅民企推介香港嘅上市環境，佢話去年開始，啲大型國企嚟香港上市，好似建設銀行、神華同交通銀行咁，再冇好似以前嘅大型國企咁，同步喺美國或倫敦等其他主要金融市場掛牌。因為，之前內地以為要去呢啲金融市場掛牌，先可以吸引到國際資金投資，但事實上，香港已經有晒呢啲功能，所以為咗慳錢慳時間，佢哋都改為單喺香港上市。