前些時，本欄講飛機陳隻新馬命名，曾建議名為Spitfire，以為中文譯名係「吸血鬼」，兩位讀者分別來電郵，一位署名「戰機愛好者」話：「Spitfire之譯名為『噴火式』，是第二次大戰螺旋槳戰機，而Vampire吸血鬼式戰機，實為二次大戰後，英國空軍之噴射引擎戰鬥機。」另一位讀者C話：「Spitfire就是『噴火式』戰鬥機。吸血鬼Vampire在五十至六十年代曾經派駐香港。」係噃，正是「吸血鬼」戰機駐港年代，香港人先至認識到「吸血鬼」。
講到馬名，許司長有隻「有聲有色」，上星期日大雨中出賽跑泥地。左丁山上到董事廂房，碰見許司長，自然問佢會唔會拉頭馬，許司長教左丁山睇馬：「『有聲有色』跑快泥唔掂嘅，跑鬆泥最好；今日落大雨，泥地變實，唔啱『有聲有色』跑嘅，今日冇機會拉頭馬！」
講到實牙實齒，信唔信好呢？側邊有VIP經過，又教左丁山：「大凡馬主、馬房叫唔使買，就要買嘞；」左丁山半信半疑，見到「有聲有色」嘅賠率只得六倍幾，卒之以「有聲有色」為配腳。跑起上嚟，「有聲有色」搏晒命，騎師萬成又推又騎，始終冇法子超越前駒，卒之跑第四輸六個馬位，顯見場地不合，實力不如。賽後又見到司長，司長話：「嗱，都講晒畀你聽啦，點有法子贏啫！」左丁山只能話「係係係」，做馬主做到佢咁老實兼且目光如炬，唔使輸冤枉錢（因為好多馬主都對自己匹馬投下感情注碼），確實少有。咁理性嘅人做政務司司長，反對派好難鑽佢空子。
喺董事廂房掛住應酬，連場大敗，幾乎清袋離場，好彩與董事拜拜之後，行到落四樓，碰到馬主F，佢話尾場佢隻馬鍾意爛地，適逢沙田落大雨，機會難逢，一定搏命，可買獨贏位置……咦，佢講完就見到隻馬猛落飛，成為位置大熱門，果然明刀明槍搏殺，於是急急搵呢隻「小飛象」做膽，拖多三四隻心水馬。哈哈，中咗三重彩兼單T，算係執番揸沙，晚飯有着落。