喺年頭辭咗聯通執行董事兼副總裁職位、好似永遠都唔停嘅盧永仁出山啦！做過電盈前身香港電訊、做過花旗banker，又搞過國企，今次佢仲可以搞啲乜？
原來又係I.T.！不過今次就少咗1點，係做fashion嘅I.T（999），做副主席、董事總經理及首席財務官。
I.T話，從未做過零售嘅盧永仁上任後，會負責集團嘅管理及營運，包括制訂策略、搞收購合併、財務管理、傳媒及投資者關係，同埋幫助集團行政總裁沈嘉偉。月薪有成16萬，另加房屋津貼9萬蚊，做滿1年仲有1個月花紅，即年薪325元。同佢舊年喺聯通嘅年薪約有287.7萬元，咪加咗13%人工，唔怪得要跳槽。
華華聽講盧永仁啱啱搬咗去淺水灣住，而I.T個辦公室咁啱喺香港仔，返工放工好方便啫。