飲茶，可以飲得好講究：龍珠花茶帶草木茉莉花香，人參烏龍「七泡有餘香」，碧螺春是「一嫩三鮮」……平常百姓如你我大抵至此已悶到發慌，都係Yumiko講得好：「之前睇書話綠茶可以消卡路里去水腫，自此我愛上飲茶。」係囉，講到尾，女人，最緊張都係美容護膚養顏，如果以茶入饌，有得食又有得靚，你話係咪更對胃？
記者：陳慧茵
攝影：何家亮
示範：譚棟師傅@逸東軒（27101093）
地址：彌敦道380號逸東酒店低層2字
茶葉即CHECK
a.龍珠花茶：福建名茶，茶色淡黃，是香片茶中之上品，其茉莉花香味有醉人之感。
b.人參烏龍茶：介於綠茶和紅茶之間的半發酵茶葉。去澀苦餘甘香，加入人參更滋潤，沖泡時茶葉散開愈快，茶質愈優。
c.碧螺春：入口香滑，屬綠茶類，有排毒去脂功效，極品碧螺春產自江蘇太湖洞庭山，是中國四大名茶之一。
蘆薈龍珠花茶糕養顏清熱
價錢：$30/4人
需時：1小時
Yumiko整花茶糕時表演雀躍：「以前爹哋去完上海梗會帶啲啫喱粉返香港，整花茶糕就好似整啫喱咁。」更重要係龍珠花茶仲可以養顏清熱，皮膚都靚啲。
材料
龍珠花茶1錢、清水1斤、砂糖3両半、蘆薈2両、魚膠粉8錢
做法
1.茶葉放滾水內浸20分鐘，隔走茶葉，蘆薈切粒；
2.加砂糖及魚膠粉至茶內，再加蘆薈粒，放雪櫃雪半小時，切成方塊狀即可。
Tips：加魚膠粉後趁茶未凝固時加蘆薈粒，咁就唔會沉底，可以懸浮茶糕中，靚晒！
人參烏龍走地雞滋陰潤喉
價錢：$40/4人
需時：45分鐘
「我好鍾意食雞，就算禽流感非常時期我都無雞不歡。」以死相博，還有另一原因：「雞肉係白肉類，唔怕肥嘛。」咁又係，不過更重要係，人參烏龍可以滋陰潤喉嘛！
材料
人參烏龍茶5錢、雞半隻、水5斤、豉油2両、乾葱2両、鹽及糖適量
做法
1.爆香乾葱，加入茶葉同炒；注入水，以慢火煮20分鐘至茶葉出味，加鹽、糖及豉油調味；
2.雞洗淨後放鑊內以慢火浸煮20分鐘至水收乾，撈起切件即可。
Tips：水要落得恰到好處，否則水份未收乾，雞會變得嚡烚烚。
碧螺春炒野菌去脂護眼
價錢：$20/4人
需時：25分鐘
Yumiko：「我知道碧螺春好矜貴，以前見嫲嫲收到時一定笑到見牙唔見眼。」矜貴茶葉配Yumiko最愛的野菌，難怪拍心口讚好，更重要係，碧螺春仲可以去脂護眼㗎！
材料
碧螺春1錢、雞髀菇、鮮冬菇及秀珍菇各4錢、清水4両、糖及豉油適量
做法
1.以滾水浸泡碧螺春20分鐘，菇類洗淨切條後汆水；
2.瀝乾水份後加入已浸泡的茶至鑊中同煮2分鐘至收乾水份，加糖及豉油調味。
Tips：鮮野菌比較腍身，煮太耐會出水，記住汆水後用毛巾印乾水份。
Yumiko：古時皇帝都好鍾意飲茶，所以我信茶葉有食療功效㗎，而且又易買到，好過下下要嘥錢去做Facial吖！
