小初嗰頭話濠賭股利好消息多，昨日就傳出新濠（200）同澳洲幫合營的澳門賭場計劃往美國上市，姑勿論呢單消息堅唔堅，總之新濠股價即刻有反應，昨日最高見18.75元，收18.15元，升8.68％。
其他如信德（242）升3.65％，收9.95元，而早排傳過有芬佬睇起嘅黃金集團（1031）表現亦唔錯，升4.4％，收2.375元，但獲注入金沙貴賓廳的浩基（628）就較肉酸，大跌18.54％，收1.45元，唔知搞邊科。
講起濠賭股，喺澳門有唔少地產項目嘅豐德麗（571），股價自4月中高位7.30元回吐，一直喺5元樓上徘徊，睇落有一定支持。昨日跌1.82％，收5.40元。
經紀黃話，豐德麗早前股價回落，主要係一些早期買入的基金沽貨食糊所致，但公司喺濠江嘅發展大計正如火如荼進行，除早排成功引入一名美國策略投資者，一齊發展澳門地產項目外，現時亦有同其他投資者傾緊。
慕容小初