亞視前晚為《情陷夜中環2》大搞宣傳，張文慈、葉璇及梁敏儀露胸搶鏡，但葉璇被大部份演員杯葛，整晚有如透明一樣，氣勢盡輸給張文慈。陳啟泰則言論出位，直指無綫的《火舞黃沙》不好看，幾位靚女主角在黃沙中都變黃臉婆。
張文慈、葉璇、梁敏儀、李思蓓及陳啟泰等一班亞視新劇《情陷夜中環2》的演員，前晚在中環出席大派對，為下周一（29日）播映的劇集造勢，其中幾位女角都以性感的服飾亮相，整個活動顯得波濤洶湧，四女主角調酒時，主持劉錫賢還笑謂：「四個一齊shake（搖）啦，好壯觀呀！」
自詡戲份重
到男女分組玩食提子遊戲時，張文慈及陳啟泰相當投入，後來張文慈說：「戲裏面我好鍾意陳啟泰，鍾意佢夠大呀！」陳啟泰即謂：「我今日都着咗deepV，有溝（乳溝）嗰隻。」
一直有傳葉璇與張文慈不和，前晚葉璇的氣勢明顯輸蝕，除了監製及金燕玲外，沒有演員肯和她交談，眾女調酒時，其餘女角開心碰杯，但就故意冷落葉璇，大合照時還故意迫她到台邊，不過葉璇仍口硬地表示與其他人合作很有默契，她說：「點會冷落我呀？我今次戲份好重，好多演員都幫過我，陳啟泰啦，金燕玲啦，我得益好多，多謝佢哋都嚟唔切。」
提到被張文慈搶鏡，葉璇謂：「個個女仔都好靚，我同個個都有傾偈，你哋見唔到啫。」張文慈衣着極性感，問她是否不能輸，張文慈直言道：「贏就最好啦，但最緊要靚同套劇有noise。」
「變晒黃臉婆」
陳啟泰得悉葉璇指他曾給予幫助，他冷淡說：「係咩？多謝囉。」問到哪位女角較靚？他則謂：「個個都靚，但今日我靚啲，最深（乳溝）係我。」
談到《情2》劇上映時對撼無綫的《火舞黃沙》，陳啟泰竟勁踩對頭，他說：「《火舞黃沙》氣勢勁，點知收視唔係想像中強，套劇成日黃金金，卡士係勁，個個都靚女，但就一片泥濘，爭乜呢？爭泥呀？好難以信服囉。」陳啟泰更直言《火》劇不好看，他又說：「個個靚女都變晒黃臉婆。」問他是否對《情2》很有信心？陳啟泰說：「信心係強，不過我哋打人哋ending，啲觀眾煲咗佢哋一排，就難少少囉。」
採訪：卓寶花
攝影：陳慧安
