𠵱家優質商廈成為市場搶奪對象，有貨喺手就唔憂賣唔出，條件辣都一樣有人要，估唔到有業主肯畀優惠條件買家出貨，認真少見。
中原香港商業部助理營業董事李百堅表示，一向交投活躍嘅上環信德中心，西翼18樓2室，面積1433方呎，投資者以931萬買入，呎價6497蚊，仲有半年成交期。買家原本傾緊同座高層2室，業主叫價都係6500蚊一呎，但只係畀1個月成交期，後尾聽到有另一個同類單位業主肯畀更長成交期，梗係嗱嗱聲入市啦。
咁睇呢個投資者買家，若放番出嚟好大機會有買家承接。
單位業主喺舊年一月用752萬買番嚟，揸咗一年多，賺179萬，升值23.8%，好過擺銀行收息。
蘭西睇番啲成交紀錄，見到信德西翼18樓11室，2534呎，今個月初以2179萬易手，呎價約8600蚊，問番中記，佢哋解釋話11室係有正海景，所以貴啲，而2室只得山景，咁咪平啲囉。而15樓1室，2559方呎，上個月以呎價6643蚊售出。